ನವ್ಯಾ ವಿಗಾರ್ ಬಾಪಾಂಕ್ ಸ್ವಾಗತ್
ಮಿಲಾರ್ ಫಿರ್ಗಜೆಚೆ ನವೆ ವಿಗಾರ್ ಮಾ. ಬಾಪ್ ಬೊನವೆಂಚರ್ ನಜ್ರೆತ್, ಸಾಯ್ಬ್ ಸಾಲ್ವಾದೊರಾಚಿ ಫಿರ್ಗಜ್, ಬೆಳ್ತಂಗಡಿ ಥಾವ್ನ್ ಆಗೋಸ್ತಾಚಾ 10 ತಾರಿಕೆರ್ ಜುಸ್ತ್ 4 ವರಾರ್ ಇಗರ್ಜೆಚ್ಯಾ ಪೋರ್ಟಿಕೊಲಾಗಿಂ ಹಾಜರ್ ಜಾಲ್ಲೆ. ಬಾಪ್ ಜೋಸೆಫ್ ಲೋಬೊ, ಸಹಾಯಕ್ ವಿಗಾರ್ ಬಾಪ್ ಅನಿಲ್ ಪಿಂಟೊ, ಫಿರ್ಗಜ್ ಯಾಜಕ್ ಬಾಪ್ ಮೈಕಲ್ ಸಾಂತುಮಯೊರ್, ಬಾಪ್ ಮ್ಯಾಕ್ಸಿ ಡ್’ಸೋಜ, ಬಾಪ್ ಕೆನೆತ್ ಕ್ರಾಸ್ತಾ, ಫಿರ್ಗಜೆಚೊ ಉಪಾಧ್ಯಕ್ಷ್ ನೈಜಿಲ್ ಪಿರೇರಾ ಆನಿಂ ಕಾರ್ಯದರ್ಶಿ ಹಿಲ್ಡಾ ರೊಡ್ರಿಗಸ್ ಹಾಜರ್ ಆಸೊನ್ ನವ್ಯಾ ವಿಗಾರಾಂಕ್ ಫುಲಾಂ ಝೆಲೆ ಘಾಲ್ನ್ ಮೊಗಾನ್ ಸ್ವಾಗತ್ ಕೆಲೆಂ. ಉಪ್ರಾಂತ್ ಪುರ್ಶಾವಾನ್ ಇಗರ್ಜೆಚಾ ಆಲ್ತಾರಿಲಾಗಿಂ ಪಾವ್ಲ್ಯಾಂವ್. ಹುದ್ದೊ ಹಸ್ತಾಂತರ್ ಕರ್ಚೆ ಭಿಸ್ಪಾಚೊ ಪ್ರತಿನಿಧಿ ವಿಗಾರ್ ಜೆರಾಲ್ ಮಾನಾಧಿಕ್ ಬಾಪ್ ಮ್ಯಾಕ್ಸಿಮ್ ನೊರೊನ್ಹಾನ್ ಚಲವ್ನ್ ವೆಲೆಂ. ಮಿಲಾರ್ಚೊ ವಿಗಾರ್ ಮಾ. ಬಾ. ಜೋಸೆಫ್ ಲೋಬೊ ಹಾಂಣಿಂ ತಾಂಚಾ ವಿಗಾರಾಚೊ ಹುದ್ದೊ ಮಾ.ಬಾ. ಬೊನವೆಂಚರ್ ನಜರೆತಾಕ್ ಹಸ್ತಾಂತರ್ ಕೆಲೊ.
ಹುದ್ದೊ ಹಸ್ತಾಂತರಾಚೆ ಕಾರ್ಯೆ ಜಾತಾಚ್ ಬಾಪ್ ಜೋಸೆಫ್ ಲೋಬೊನ್ ನವ್ಯಾ ವಿಗಾರಾಕ್ ತಶೆಂಚ್ ಹಾಜರ್ ಆಸ್‍ಲ್ಲ್ಯಾ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ಉಪ್ರಾಂತ್ ನವ್ಯಾ ವಿಗಾರಾನ್ ಪವಿತ್ರ್ ಪುಸ್ತಕಾ ಥಾವ್ನ್ ವಾಚ್‍ಲ್ಲ್ಯಾ ಉತ್ರಾಂಕ್ ಸರಿ ಜಾವ್ನ್ ಆಪ್ಲಿಂ ಭೊಗ್ಣಾಂ ಉಚಾರ್ನ್ ಸರ್ವಾಂಕ್ ದೇವ್ ಬರೆಂ ಕರುಂ ಮ್ಹಳೆಂ. ಉಪ್ರಾಂತ್ ಉಪಾಧ್ಯಕ್ಷ್, ಕಾರ್ಯದರ್ಶಿ, ಸರ್ವ್ ಯಾಜಕಾನಿಂ, ಸಂಘ್-ಸಂಸ್ಥ್ಯಾಚ್ಯಾ ಮುಖೆಲ್ಯಾನಿಂ ನವ್ಯಾ ವಿಗಾರಾಕ್ ಫುಲಾಂ ದೀವ್ನ್ ತಾಂಹ್ಯಾ ನವ್ಯಾ ಮಿಸಾಂವಾಕ್ ಉಲ್ಲಾಸ್ ಪಾಠಯ್ಲೆಂ. ವಿಗಾರ್ ಜೆರಾಲ್ ಮಾ| ಬಾಪ್ ಮ್ಯಾಕ್ಸಿಮ್ ನೊರೊನ್ಹಾ ಹಾಣಿಂ ನವ್ಯಾ ವಿಗಾರಾಕ್ ಬೊರೆಂ ಮಾಗ್ಲೆಂ.
ಹೆಂ ಸಗ್ಳೆಂ ಕಾರ್ಯೆಂ ಮಾಂಡುನ್ ಹಾಡ್‍ಲ್ಲ್ಯಾಂಚೊ ಕಾರ್ಯದರ್ಶಿ ಹಿಲ್ಡಾ ರೊಡ್ರಿಗಸಾನ್ ಧನ್ಯವಾದ್ ಪಾಠಯ್ಲೆಂ. ಉಪ್ರಾಂತ್ ಹಾಜರ್ ಆಸ್‍ಲ್ಲ್ಯಾ ಸೈರ್ಯಾಂಕ್ ಆನಿಂ ಫಿರ್ಗಜ್‍ಗಾರಾಂಕ್ ಕಾಫಿ ಫಳಾರ್ ಆಸಾ ಕೆಲ್ಲೊ.
ಸಗ್ಳೆ ಕಾರ್ಯೆಂ ಬಾಪ್ ಕೆನೆತ್ ಕ್ರಾಸ್ತಾ ಆನಿಂ ಸಹಾಯಕ್ ವಿಗಾರ್ ಬಾಪ್ ಅನಿಲ್ ಪಿಂಟೊನ್ ಚಲವ್ನ್ ವೆಲೆಂ. ಮಾನಾಧಿಕ್ ಬಾಪ್ ಬೊನವೆಂಚರ್ ತುಮ್ಕಾಂ ಬೊರೆಂ ಮಾಗ್ತಾತ್ ಉಪಾಧ್ಯಕ್ಷ್, ಕಾರ್ಯದರ್ಶಿ, ಗೊವ್ಳಿಕ್ ಮಂಡಳಿ, ಮಿಲಾರ್ ಫಿರ್ಗಜ್‍ಗಾರಾಂ.
ದೇವ್ ಬರೆಂ ಕರುಂ.