ಫೆಬ್ರವರಿಚಾ 25 ತಾರೀಕೆರ್ ಕ್ರಿಸ್ತಾಂವ್ ಶಿಕ್ಷಣಾಚೊ ದೀಸ್ ಆಚರಣ್ ಕೆಲೊ. ಹ್ಯಾ ವರ್ಸಾ ದೆವಾನ್ ಆಮ್ಕಾಂ ಭಾವಾರ್ಥಾನ್ ವಾಡೊಂಕ್ ಆನಿ ಬರ್ಯಾ ಶೆಗುಣಾನಿಂ ಆಮ್ಚೆಂ ಜಿವಿತ್ ರೂಪಿತ್ ಕರುಂಕ್ ಆಧಾರ್ ಆನಿ ಕುರ್ಪಾ ದಿಲ್ಲ್ಯಾ ಪಾಸತ್ ಸರ್ವ್ ಲ್ಹಾನಾ ತಶೆಂಚ್ ವ್ಹಡಾಂ ಸಾಂಗಾತಾ ಮೆಳೊನ್ ಸಕಾಳಿಂ 9.30 ವರಾರ್ ಅರ್ಗಾಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಾ|ಬಾ|ಪೀಟರ್ ಗೊನ್ಸಾಲ್ವಿಸ್, ಸಾಂ. ಅಂತೊನ್ ಆಸ್ರ್ಯಾಚೊ ಸಹಾಯಕ್ ದಿರೆಕ್ತೊರ್ ಹಾಣಿ ಮಿಸಾಚೆಂ ಬಲಿದಾನ್ ಭೆಟವ್ನ್ ಅರ್ಥಾಭರಿತ್ ಶೆರ್ಮಾಂವ್ ದಿಲೊ. ಹ್ಯಾ ಸಗ್ಳ್ಯಾ ವರ್ಸಾ ದೊತೊರ್ನಿಚಾ ಕ್ಲಾಸಿಂತ್ ಶಿಕ್‍ಲ್ಲೆ ಪ್ರಮುಖ್ ಶೆಗುಣ್ ಬರವ್ನ್ ಪುರ್ಶಾಂವಾರ್ ಹಾಡ್ನ್ ಆಲ್ತಾರಿ ಮುಳಾಂತ್ ದವರ್ಲೆ.
ಸಾಂಜೆರ್ 5 ವರಾರ್ ಭಾವಾರ್ಥಾಕ್ ಆನಿ ಆತ್ಮೀಕ್ ಜಿವಿತಾಕ್ ಸಂಬಂಧ್ ಜಾವ್ನ್ ಸಾಂಸ್ಕೃತಿಕ್ ಕಾರ್ಯೆಂ ಮಾಂಡುನ್ ಹಾಡ್‍ಲ್ಲೆಂ. ಸಹಾಯಕ್ ವಿಗಾರ್ ಬಾಪ್ ಎಡ್ವಿನ್ ಮೊನಿಸ್ ಹಾಣಿ ಸರ್ವಾಂಕ್ ಕಾರ್ಯಾಕ್ ಸ್ವಾಗತ್ ಕೆಲೊ. ಮಾನೆಸ್ತಿಣ್ ಸಿಂತಿಯಾ ಮಾರ್ಟಿಸ್ ಹಾಣಿ ಸಗ್ಳ್ಯಾ ವರ್ಸಾ ಮಾಂಡುನ್ ಹಾಡ್‍ಲ್ಲ್ಯಾ ವಿವಿಧ್ ಚಟುವಟಿಕೆಂಚಿ ವಾರ್ಷಿಕ್ ವರ್ದಿ ವಾಚ್ಲಿ.
ಮುಕೆಲ್ ಸೈರಿ ಜಾವ್ನ್ ಮಾನೆಸ್ತಿನ್ ಡೊರಿಸ್ ಲೋಬೊ ಹಾಜರ್ ಆಸ್‍ಲ್ಲಿ. ಕ್ರೀಸ್ತೀ ಶಿಕ್ಷಣಾಚಾ ಮಹತ್ವಾವಿಶಿಂ ಉತ್ತೀಮ್ ಸಂದೇಶ್ ತಿಣೆ ದಿಲೊ. ಹರ್ಯೆಕಾ ಕ್ಲಾಸಿ ಥಾವ್ನ್ ನೃತ್ಯ್ ವಾ ಮಟ್ವ್ಯಾ ನಾಟ್ಕುಳ್ಯಾಂ ಮುಕಾಂತ್ರ್ ಸರ್ವಾಂಚಿ ಮನಾಂ ಧಾದೊಶಿ ಕೆಲಿಂ. ದೊತೊರ್ನಿಚಾ ಪರೀಕ್ಷೆಂತ್, ರೆಕಾರ್ಡ್ ಬೂಕಾಂತ್ ಆನಿ ಚುಕನಾಸ್ತಾನಾ ದೊತೊರ್ನಿಕ್ ಆಯಿಲ್ಲ್ಯಾ ಭುರ್ಗ್ಯಾಂಕ್ ಇನಾಮಾಂ ವಾಂಟ್ಲಿಂ. ಕಾರ್ಯಾಚಿ ಸಂಯೋಜಕ್ ಮಾನೆಸ್ತಿನ್ ಮೀನಾ ಫೆರಾವೊನ್ ಸರ್ವಾಂಕ್ ಧನ್ಯವಾದ್ ಪಾಠಂವ್ಚ್ಯಾ ಮುಕಾಂತ್ರ್ ಕಾರ್ಯೆಂ ಸಂಪಯ್ಲೆಂ.