ಅಗೋಸ್ತ್ 15 ಆಮ್ಕಾಂ ದೊಡ್ತ್ಯಾ ಸಂತೊಸಾಚೊ ದೀಸ್ ಜಾವ್ನಾಸಾ. ಪಯ್ಲೆಂ – ಆಜ್ ಆಮ್ಕಾಂ ಮರಿಯೆಚಾ ಸ್ವರ್ಗಾವ್ಹರಾಣಾಚೊ ದೀಸ್ ಜಾವ್ನಾಸಾ. ದುಸ್ರೆಂ – ಆಮ್ಚ್ಯಾ ಭಾರತ್ ದೇಶಾಕ್ ಸ್ವತಂತ್ರ್ ಮೆಳ್‍ಲ್ಲೊ ದೀಸ್ ಜಾವ್ನಾಸಾ. ಆಮಿ ಮಿಸಾಚಾ ಬಲಿದಾನಾಂತ್ ವಾಂಟೊ ಘೆವ್ನ್ ಮರಿಯೆ ಮಾಯೆಕ್ ಕುಡಿ ಅತ್ಮ್ಯಾ ಸಮೇತ್ ಸರ್ಗಿಂ ಘೆತ್‍ಲ್ಲೆಂ ಫೆಸ್ತ್ ಆಚರಣ್ ಕೆಲೆಂ. ಮಿಸಾ ಉಪ್ರಾಂತ್ ಇಗರ್ಜೆಚಾ ಉಗ್ತ್ಯಾ ಮೈದಾನಾರ್ ಆಮ್ಚ್ಯಾ ರಾಷ್ಟ್ರಾಚೊ ಬಾವ್ಟೊ ಉಬಾರ್ನ್ ಆಮ್ಚ್ಯಾ ರಾಷ್ಟ್ರಾಕ್ ಮಾನ್ ಕರ್ಚೊ ಸಂಭ್ರಮ್ ಮಾಂಡುನ್ ಹಾಡ್ಲೊ. ಹ್ಯಾ ಕಾರ್ಯಾಕ್ ವಿಗಾರ್ ಬಾಪ್ ವಲೇರಿಯನ್ ಸೊಜ್ ಹಾಣಿ ಮಾನಾಚಾ ಸಯ್ರ್ಯಾಂಕ್ ತಶೆಂಚ್ ಜಮ್‍ಲ್ಲ್ಯಾ ಸರ್ವ್ ಲೊಕಾಕ್ ಸ್ವಾಗತ್ ಕೆಲೊ. ಕಥೊಲಿಕ್ ಸಭೆಚೊ ಉಪಾಧ್ಯಕ್ಷ್ ಮಾನೆಸ್ತ್ ವಲೇರಿಯನ್ ಸೊಜ್ ಹಾಣೆ ಮುಖೆಲ್ ಸಯ್ರಿ ಮಾನೆಸ್ತಿನ್ ಮರಿಯ್ ಫಿಲಿಸ್ ಡಿಕೊಸ್ತಾ ಹಿಚಿ ವಳಕ್ ಕರ್ನ್ ದಿಲಿ. ಮಾನೆಸ್ತಿನ್ ಮರಿಯ ಫಿಲಿಸ್ ಡಿಕೊಸ್ತಾ ಹಿಣೆಂ ಧ್ವಜಾರೋಹಣ್ ಕರ್ನ್ ಸಂದೇಶ್ ದಿಲೊ. ಗಾಯಾನ್ ಮಂಡಳಿಚಾ ಸಾಂದ್ಯಾನಿಂ ಆನಿ ಮಿಲಾರ್ ಇಸ್ಕಲಾಚಾ ಎನ್. ಸಿ.ಸಿ. ಟ್ರೂಪಾನಿ ಹ್ಯಾ ಸಂಭ್ರಮಾಚಿ ಸೊಬಾಯ್ ಚಡಯ್ಲಿ. ಮಾನೆಸ್ತಿನ್ ಜಸಿಂತಾ ಫೆರ್ನಾಂಡಿಸಾನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಕಥೊಲಿಕ್ ಸಭೆಚಿ ಅಧ್ಯಕ್ಶಿಣ್ ಮಾನೆಸ್ತಿನ್ ಫಿಲೋಮಿನಾ ಫೆರಾವೊನ್ ಧನ್ಯವಾದ್ ದಿಲೆ.
