ಸಪ್ಟೆಂಬರಾಚ್ಯಾ 17 ತಾರಿಕೆರ್ ಆಯ್ತಾರಾ ದನ್ಪಾರಾಂ 12 ವರಾರ್ ಶ್ರೀ ಸಿಪ್ರಿಯನ್ ಆನಿ ಶ್ರೀಮತಿ ಹೆಲೆನ್ ಪಿಂಟೊ (ಗುರ್ಕಾರ್ನ್) ಹಾಂಚ್ಯಾ ಘರಾ ಮೊಂತಿ ಫೆಸ್ತ್ ಆಚರಣ್ ಕೆಲೆಂ. ವಾಡ್ಯಾಂತ್ಲಿ 41 ಸಾಂದೆ, ಮಾರ್ಜಿಲ್ ಕೊವೆಂತಾಚಿ 4 ಸಿಸ್ಟರಾಂ ಆನಿ ಆಮ್ಚೆ ವಿಗಾರ್ ಬಾಪ್ ವಲೇರಿಯನ್ ಡಿ’ಸೋಜಾ ಹಾಜರ್ ಆಸ್‍ಲ್ಲೆ. ಸಿಪ್ರಿಯನ್ ಪಿಂಟೊನ್ ಸಮೆಸ್ತಾಂಕ್ ತಾಂಚ್ಯಾ ಘರಾ ಸ್ವಾಗತ್ ಕೆಲೊ.
ಮಾಗ್ಣ್ಯಾವಿಧಿಚ್ಯಾ ಸುರ್ವೆರ್ ‘‘ಯೆಯಾ ತರ್ ಅಂಜಾನೊ’’ ಗೀತ್ ಗಾವ್ನ್ ಬಾಳಕ್ ಮರಿಯೆಕ್ ಸ್ವಾಗತ್ ಕೆಲೊ. ದೆವಾಚೆಂ ಉತಾರ್ ಲೂಕ್ 1:46-56 ‘ಮರಿಯೆಚೆಂ ಸ್ತುತಿ ಗೀತ್’ ವಾಚುನ್ ನಿಯಾಳ್ ಕೆಲೊ. ಭಾವಾಥ್ರ್ಯಾಚಿಂ ಪ್ರಾರ್ಥನಾ ಭೆಟಯ್ಲ್ಯಾ ಉಪ್ರಾಂತ್ ಬಾಳೊಕ್ ಮರಿಯೆಚೆಂ ನೊವೆನ್ ಕೆಲೆಂ. ಉಪ್ರಾಂತ್ ಹಾಜರ್ ಆಸ್‍ಲ್ಲ್ಯಾ ಸಮೇಸ್ತಾಂನಿ ಬಾಳಕ್ ಮರಿಯೆಕ್ ಫುಲಾಂ ಅರ್ಪುನ್ ಮಾನ್ ಕೆಲೊ. ಹ್ಯಾ ವೆಳಾರ್ ಸಕ್ಡಾಂನಿ ಸಾಂಗಾತಾ ‘ಸಕ್ಕಡ್ ಸಾಂಗಾತಾ ಮೆಳ್ಯಾಂ’ ಗೀತ್ ಗಾಯ್ಲೆಂ. ಉಪ್ರಾಂತ್ ಆಮೊರಿ ಮ್ಹಳಿ. ನವೆಂ ಸೆಂವ್ಚ್ಯಾಚೊ ಮಹತ್ವ್ ವಿವರುನ್ ಸಾಂಗ್ಲ್ಯಾ ಉಪ್ರಾಂತ್ ಗುರ್ಕಾರ್ನಿನ್ ಪಿಟೊ ಕೆಲ್ಲೆಂ ನವೆಂ ಪೀವನಾಂತ್ ಭರ್ಸುನ್ ಸಮೇಸ್ತಾಂಕ್ ವಾಂಟ್ಲೆಂ.
ಹೌಸಿ ಹೌಸಿ ಖೆಳ್ ಚಲವ್ನ್ ವ್ಹೆಲೊ ಆನಿ ಜಿಕ್‍ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ. ವಿಗಾರ್ ಬಾಪಾಂನಿ ತಾಂಚ್ಯಾ ಸಂದೇಶಾಂತ್ ‘‘ಆಮ್ಚ್ಯಾ ರಾಜ್ಯಾಂತ್ ಮರಿಯೆ ಮಾಯೆಕ್ ಭೆಟವ್ನ್ ದಿಲ್ಲ್ಯಾ ವಿವಿಧ್ ಇಗರ್ಜಾಂಚೊ ಉಲ್ಲೇಖ್ ಕೆಲೊ ಆನಿ ಮರಿ ಕಸೊ ಆಮ್ಚೊ ಮೋಗ್ ಕರ್ತಾ ಮ್ಹಣ್ ವಿವರ್ಸಿಲೆಂ. ಶ್ರೀಮತಿ ಲಿನೆಟ್ ಡಿ’ಸೋಜಾನ್ ಧನ್ಯವಾದ್ ಸಮರ್ಪಣ್ ಕೆಲೆಂ. ಮಾಗ್ಣ್ಯಾವಿಧಿ ಅಖೇರ್ ಕರ್ಚ್ಯಾ ಪಯ್ಲೆಂ ‘‘ಭಾಗಿಂತ್ಲಿ ಗುಂತುನ್ ಫುಲಾಂ ಶೆತಾಂತ್ಲಿ ಹಾಡುನ್ ಫಳಾಂ’’ ಗೀತ್ ಸಮೇಸ್ತಾಂನಿ ಸಾಂಗಾತಾ ಗಾಯ್ಲೆಂ. ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ರಾಂದ್ವಯೆಚೆಂ ಜೆವಾಣ್ ಆನಿ ವೊರ್ನ್ ತಯಾರ್ ಕೆಲ್ಲೆಂ. ವಿಗಾರ್ ಬಾಪಾಂನಿ ಜೆವ್ಣಾಚೆರ್ ಆಶೀರ್ವಾದ್ ಮಾಗ್ಲೊ. ಆಚರಣಾಂತ್ ಭಾಗ್ ಘೆತ್‍ಲ್ಲ್ಯಾ ಸಮೆಸ್ತಾಂಕ್ ಕಾರ್ಯೆಂ ಬರೆಂ ಲಾಗ್ಲೆಂ. ಜೆವಾಣ್ ತಯಾರ್ ಕರುಂಕ್ ವಾವುರ್‍ಲ್ಲ್ಯಾ ತಶೆಂಚ್ ಪ್ರಾಯೋಜಕಾಂಕ್ ದೇವ್ ಬರೆಂ ಕರುಂ ಮ್ಹಳೆಂ.