ಸಾಂ. ಪಾವ್ಲ್ ವಾಡ್ಯಾಚೆಂ ಫೆಸ್ತ್ 21 ತಾರ್ಕೆರ್ ಸಾಂಜೆರ್ 5 ವೊರಾಂಚಾ ಮಿಸಾಚಾ ಬಲಿದಾನಾ ಸವೆಂ ಆರಂಭ್ ಕೆಲೆಂ. ಸರ್ವ್ ವಾಡ್ಯಾಗಾರಾಂನಿ ಮಿಸಾಚಾ ಬಲಿದಾನಾಂತ್ ವಾಂಟೊ ಘೆವ್ನ್ ಭಕ್ತಿಪಣ್ ಆದಾರ್ಲೆಂ. ವಿಗಾರ್ ಬಾಪಾನಿಂ ಸಾಂ. ಪಾವ್ಲಾ ವಿಶ್ಯಾಂತ್ ಸಮ್ಜಣಿ ದೀವ್ನ್ ಬರೊ ಸಂದೇಶ್ ದಿಲೊ. ಮಿಸಾ ಉಪ್ರಾಂತ್ ಸರ್ವ್ ವಾಡ್ಯಾಗಾರಾಂ ಫಿರ್ಗಜ್ ಸಾಲಾಂತ್ ಜಮ್ಲಿಂ. ಕಾಫಿಫಳಾರ್ ಜಾತಚ್ ತ್ಯಾ ದಿಸಾಚೆಂ ಕಾರ್ಯೆಂ ಸುರ್ವಾತ್ಲೆಂ. ಉತ್ರಾಂ ಆನಿ ತಾಳೊ ಗಾಲ್ನ್ ಸ್ವಾಗತ್ ಗೀತ್ ಘಡ್‍ಲ್ಲ್ಯಾ ಶ್ರೀಮತಿ ಎಡ್ನಾ ವೇಗಸಾನ್ ವಾಡ್ಯಾಂತ್ಲಿ ಝಿಳ್ಮಿಳ್ಚಾ ತಾರಾಂ ಸಂಗಿಂ ಸ್ವಾಗತ್ ಗೀತ್ ಗಾಯ್ಲೆಂ. ಮುಖೆಲ್ ಸಯ್ರೊ ಜಾವ್ನ್ ಭೋವ್ ಮಾನಾಧಿಕ್ ವಿಗಾರ್ ಬಾಪ್ ವಲೇರಿಯನ್ ಸೊಜಾ ಸಂಗಿ ಸಹಾಯಕ್ ವಿಗಾರ್ ಬಾಪ್ ಎಡ್ವಿನ್ ಮೊನಿಸ್, ಬಾಪ್ ವಿಲಿಯಂ ಗೊನ್ಸಾಲ್ವಿಸ್, ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷಿಣ್ ಸಿಸಿಲಿಯಾ ಪಿರೇರಾ, ಗುರ್ಕಾರ್ ತಶೆಂಚ್ ಕಾರ್ಯದರ್ಶಿ ಜಾವ್ನ್ ಮಾನೆಸ್ತ್ ಐವನ್ ಫೆರ್ನಾಂಡಿಸ್ ವೆದಿರ್ ಆಸ್‍ಲ್ಲೆ. ಗುರ್ಕಾರಾನ್ ವೆದಿರ್ ಆಸ್‍ಲ್ಲ್ಯಾ ಸಯ್ರ್ಯಾಂಕ್ ಆನಿ ಹಾಜರ್ ಆಸ್‍ಲ್ಲ್ಯಾ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ ಅನಿ ಸೈರ್ಯಾಂಕ್ ಆನಿ ಹಾಜರ್ ಆಸ್‍ಲ್ಲ್ಯಾ ವಾಡ್ಯಾಂತ್ಲ್ಯಾ ಸರ್ವ್ ಗುರ್ಕಾರಾಂಕ್ ಫುಲಾಂ ಆನಿ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ. ಗುರ್ಕಾರಾಚಾ ತರ್ಫೆನ್ ವಾಡ್ಯಾಂತ್ ಸೆವಾ ದಿಂವ್ಚ್ಯಾ ವಾಡ್ಯಾ ಪ್ರತಿನಿಧಿಂಕ್, ಏರಿಯಾ ಲೀಡರಾಂಕ್ ಉಡಾಸಾಚಿ ಕಾಣಿಕ್ ದಿಲಿ. ಸಮಾಜ್ ಸೇವಕಿ ಕುಮಾರಿ ಟ್ರೀಜ ಪಿಂಟೊ ಹಿಚ್ಯಾ ಸೆವೆಕ್ ವಾಡ್ಯಾತರ್ಫೆನ್ ವಿಗಾರ್‍ಬಾಪಾನಿಂ ಶಾಲ್ ಪಾಂಗ್ರುನ್ ಫುಲಾಂ, ಫಳಾಂ ದೀವ್ನ್ ಮಾನ್ ಕೆಲೆಂ. ಬೈಬಲ್ ಕ್ವಿಜಾಂತ್ ಜಿಕ್‍ಲ್ಲ್ಯಾ ಮರ್ಲಿನ್ ಫೆರಾವೊ, ಒಲಿಂಡಾ ಫೆರ್ನಾಂಡಿಸ್ ಆನಿ ಮೆಲ್ಜೊಯ್ ಡಿಸೋಜ ಹಾಂಕಾಂ ಉಡಾಸಾಚಿ ಕಾಣಿಕ್ ದಿಲಿ. ಬೆಥನಿಚಿ ಧರ್ಮ್‍ಭಯ್ಣ್ ಸಿಸ್ಟರ್ ಇಮಾನಿ ಹಿಕಾಯೀ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ. ಉಪ್ರಾಂತ್ ವಿಗಾರ್ ಬಾಪಾನಿಂ ಫೆಸ್ತಾ ಸಂದರ್ಭಿ ಸಂದೇಶ್ ದಿಲೊ. ಸರ್ವ್ ವಾಡ್ಯಾಗಾರಾಂ ಸಾಂಗಾತಾ ಮೆಳೊನ್, ಸರ್ವ್ ಕಾಮಾಂ ವಾಂಟುನ್ ಘೆವ್ನ್ ಆಚರ್ಸಿಲ್ಲೊ ಹೊ ದೀಸ್ ಪಳೆವ್ನ್ ವಿಗಾರ್‍ಬಾಪಾನಿಂ ಸಂತೊಸ್ ಉಚಾರ್ಲೊ. ಮನೋರಂಜನ್ ಕಾರ್ಯಕ್ ಭುರ್ಗ್ಯಾಂ ಥಾವ್ನ್ ನಾಚ್ ಪ್ರದರ್ಶಿತ್ ಜಾಲೊ. ಮಾನೆಸ್ತಿಣ್ ಲೋನಾ ಪಿಂಟೊ ಆನಿ ಮಾನೆಸ್ತ್ ಬರ್ನಾರ್ಡ್ ಡಿಸೋಜನ್ ಖೆಳ್ ಖೆಳವ್ನ್ ಜಿಕ್‍ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ. ರಾಜಕೀಯ್ ಸಂಚಾಲಕ್ ಮಾನೆಸ್ತ್ ದೀಪಕ್ ಡಿಸೋಜಾನ್ ವೋಟರ್ ಐಡಿ, ಶಿಕ್ಷಕ್ ಆನಿ ಪದವೀಧರಾಂಚಾ ಚುನಾವಣಾಕ್ ನಾಂವಾಂ ದಾಖಲ್ ಕರುಂಕ್ ಜಾಯ್ ಮ್ಹಳ್ಳಿ ಮಾಹೆತ್ ದಿಲಿ. ಮಾನೆಸ್ತಿಣ್ ನಿನೆಟ್ ಟೆಲ್ಲಿಸಾಚಾ ಮಾರ್ಗದರ್ಶನಾ ಖಾಲ್ ವಾಡ್ಯಾಗಾರಾನಿ ನಾಚ್ಪಾಸಂಗಿ ಮಾಂಡೊ ಸಾದರ್ ಕೆಲೊ. ವಾಡ್ಯಾಚಾ ಖಂಚಾಯೀ ಕಾರ್ಯಾಕ್ ಸಹಕಾರ್ ದಿಂವ್ಚ್ಯಾ ಶ್ರೀಮತಿ ಎಡ್ನಾ ವೇಗಸ್ ಆನಿ ಶ್ರೀಮತಿ ನಿನೆಟ್ ಟೆಲ್ಲಿಸ್ ಹಾಂಕಾ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ.
ಆ್ಯರನ್ ಕೆಟರರ್ಸ್ ಹಾಣಿ ತಯಾರ್ ಕೆಲ್ಲ್ಯಾ ಜೆವ್ಣಾಚೆರ್ ಸಹಾಯಕ್ ವಿಗಾರ್ ಬಾಪ್ ಮಾ|ಎಡ್ವಿನ್ ಮೊನಿಸಾನ್ ಆಶೀರ್ವಾದ್ ಮಾಗ್ಲೊ. ಸರ್ವಾಂ ಜೆವಾಣ್ ಸೆವುನ್ ಧಾದೊಶಿಂ ಜಾಲಿಂ. ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸ್ ಆನಿ ಜೊಯ್ವಿನ್ ಮಾಡ್ತಾ ಹಾಣಿ ಭೋವ್ ಆಪೂರ್ಬಾಯೆನ್ ಕಾರ್ಯೆಂ ಚಲವ್ನ್ ವೆಲೆಂ. ಫೆಸ್ತಾ ಖಾತಿರ್ ಮಿನತ್ ಕಾಡ್‍ಲ್ಲ್ಯಾ ಆನಿ ದಾನ್ ದಿಲ್ಲ್ಯಾ ಆನಿ ಫೆಸ್ತಾಕ್ ಹಾಜರ್ ಆಸ್‍ಲ್ಲ್ಯಾ ವಾಡ್ಯಾಚೊ ಪ್ರತಿನಿಧಿ ಮಾನೆಸ್ತ್ ಬರ್ನಾರ್ಡ್ ಡಿಸೋಜಾನ್ ಸರ್ವಾಂಚೊ ಉಪ್ಕಾರ್ ಆಟಯ್ಲೊ. 9 ವೊರಾರ್ ಕಾರ್ಯೆಂ ಆಖೇರ್ ಜಾಲೆಂ.