ನವೆಂಬರಾಚಾ 25 ತಾರೀಕೆರ್ ಜೆಜು ರಾಯಾಚಾ ಫೆಸ್ತಾ ದಿಸಾಚ್ಚ್ “ಜೆಜು ರಾಯ್” ವಾಡ್ಯಾಗಾರಾನಿಂ ಪಯಿಲ್ಲೆಂ ಪಾವ್ಟಿಂ ವಾಡ್ಯಾಚೆಂ ಫೆಸ್ತ್ ಆಚರಣ್ ಕೆಲೆಂ. ಆಯ್ತಾರಾ ಸಕಾಳಿಂ 7.00 ವರಾರ್ ಅರ್ಗಾಂ ಮಿಸಾಚೆಂ ಬಲಿದಾನ್ ಭೋವ್ ಅರ್ಥಾಭರಿತ್ ಆನಿ ಭಕ್ತಿಪಣಾನ್ ಸಂಭ್ರಮ್ಲೆಂ. ಮಾನಾಧೀಕ್ ವಿಗಾರ್ ಬಾಪ್ ವಲೇರಿಯನ್ ಡಿಸೋಜಾನ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ವಾಡ್ಯಾಗಾರಾನಿಂ ಮಿಸಾಚಾ ಬಲಿದಾನಾಂತ್ ವಾಂಟೊ ಘೆತ್ಲೊ ತಶೆಂಚ್ ಸಬಾರ್ ಸಾಂದ್ಯಾನಿಂ ಕಾಣಿಕೊ ಭೆಟಯ್ಲ್ಯೊ.
ಫೆಸ್ತಾಚೊ ಸಂಭ್ರಮ್ ಆಚರಣ್ ಕರುಂಕ್ ತ್ಯಾಚ್ ದಿಸಾ ಸಕಾಳಿಂ 10.30 ವರಾರ್ ಫಿರ್ಗಜ್ ಸಾಲಾಂತ್ ಆಮಿ ಸಾಂಗಾತಾ ಮೆಳ್ಳಾಂವ್. ಕು|ವಿನೋನಾ ಅನಿ ಪಂಗಡ್ ಪ್ರಾರ್ಥನಾಂ ಗಿತಾ ಸವೆಂ ಕಾರ್ಯಕ್ರಮಾಚಿ ಸುರ್ವಾತ್ ಕೆಲಿ. ಗುರ್ಕಾರ್ನ್ ಮರಿಯಾ ಲೂವಿಸಾನ್ ಸರ್ವಾಂಕ್ ವಾಡ್ಯಾಚಾ ತರ್ಫೆನ್ ಮೊಗಾಚೊ ಆನಿ ಮಾನಾಚೊ ಯೆವ್ಕಾರ್ ಮಾಗ್ಲೊ. ಕಾರ್ಯಾಕ್ ವೆದಿಚೆರ್ ಅಧ್ಯಕ್ಷ್ ಜಾವ್ನ್ ವಿಗಾರ್ ಮಾನಾಧಿಕ್ ಬಾಪ್ ವಲೇರಿಯನ್ ಡಿಸೋಜಾ, ಸಹಾಯಕ್ ವಿಗಾರ್ ಮಾನಾಧಿಕ್ ಬಾಪ್ ಎಡ್ವಿನ್ ಮೊನಿಸ್, ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷಿಣ್ ಮಾನೆಸ್ತಿಣ್ ಸಿಸಿಲಿಯಾ ಪಿರೇರಾ ಆನಿ ಕಾರ್ಯದರ್ಶಿ ಮಾನೆಸ್ತ್ ಐವನ್ ಫೆರ್ನಾಂಡಿಸ್ ಹಾಜರ್ ಆಸ್‍ಲ್ಲೆ. ಮಾಲ್ಘಡೆ ಯಾಜಕ್ ಮಾ|ಬಾ|ವಿಲಿಯಂ ಗೊನ್ಸಾಲ್ವಿಸ್ ಆನಿ ಮಿಲಾರ್ ಇಸ್ಕೊಲಾಚೆ ಸಹಾಯಕ್ ಪ್ರಿನ್ಸಿಪಾಲ್ ಮಾ|ಬಾ|ಮ್ಯಾಕ್ಸಿ ಡಿಸೋಜಾ ಹಾಂಕಾ ಫುಲಾಂ ಆನಿ ಫಳಾಂ ದೀವ್ನ್ ಮಾನ್ ದಿಲೊ. ತಶೆಂಚ್, ಆಪವ್ಣೆಂ ಸ್ವೀಕಾರ್ ಕರ್ನ್ ಮೊಗಾನ್ ಹಾಜರ್ ಜಾಲ್ಲ್ಯಾ ಫಿರ್ಗಜೆಚಾ ವಿವಿಧ್ ವಾಡ್ಯಾಚೆ ಗುರ್ಕಾರ್ ಅನಿ ಆಮ್ಚಿ ಸಯ್ರಿಂ ಜಾವ್ನ್ ಆಯಿಲ್ಲ್ಯಾ ಸಾಂ. ಫ್ರಾನ್ಸಿಸ್ ಸಾವೆರ್ ವಾಡ್ಯಾಚಾ ಕೋರ್ ಸಮಿತಿಚಾ ಸಾಂದ್ಯಾಂಕ್, ಮಾನೆಸ್ತ್ ವಾಲ್ಟರ್ ನಜರೆತ್ ಆನಿ ಮಾನೆಸ್ತ್ ಸಿಪ್ರಿಯನ್ ವಾಸ್ ಹಾಂಕಾ ಸರ್ವಾಂಕ್ ಫಳಾಂ ದೀವ್ನ್ ಸ್ವಾಗತ್ ಕೆಲೊ. ತಶೆಂಚ್ ಶಿಕ್ಪಾ ಕ್ಷೇತ್ರಾಂತ್ ಧಾವಿ, ಪಿಯುಸಿ, ಡಿಗ್ರಿ, ಖೆಳಾಂತ್ ಆನಿ ಊಂಚ್ಲ್ಯಾ ಶಿಕ್ಪಾಂತ್ ಸಾಧನ್ ಕೆಲ್ಲ್ಯಾ ಸರ್ವ್ ಭುರ್ಗ್ಯಾಂಕ್ ಮುಖೆಲ್ ಸೈರ್ಯಾಂನಿ ಫಳಾಂ ಆನಿ ಕಾಣಿಕ್ ದೀವ್ನ್ ಅಭಿನಂದನ್ ಪಾಟೈಲೆಂ. ತಶೆಂಚ್ ಗುರ್ಕಾರ್ನಿನ್ ವಾಡ್ಯಾಚಾ ಕೋರ್ ಸಮಿತಿಚಾ ಸಾಂದ್ಯಾಂಚೊ ಉಪ್ಕಾರ್ ಭಾವುಡ್ನ್ ತಾಂಕಾಂ ಫಳಾಂ ದೀವ್ನ್ ಮಾನ್ ಕೆಲೊ.
ಹ್ಯಾಚ್ ದಿಸಾ ಪರಿಸರಚ್ಯಾ ಆಯ್ತಾರಾಚೆಂ ಆಚರಣ್ ಆಸ್‍ಲ್ಲೆಂ. ತಶೆಂ ಆಮಿ ವಾಡ್ಯಾಗಾರಾನಿಂ ಆಮ್ಚ್ಯಾ ಪಯಿಲ್ಲ್ಯಾ ವಾಡ್ಯಾಚಾ ಫೆಸ್ತಾಚಾ ಉಡಾಸಾ ಖಾತಿರ್ ಆಮಿ ಫಳಾಂ ಆನಿ ಫುಲಾಂ ಜಡಾಂ ಫಿರ್ಗಜೆಕ್ ಅರ್ಪಿತ್ ಕೆಲಿಂ.
ಮಾನೆಸ್ತಿಣ್ ಮರಿಯಾ ಲುವಿಸಾನ್ ವಾರ್ಶಿಕ್ ವರ್ದಿ ಮಂಡಣ್ ಕೆಲಿ. ಅಧ್ಯಕ್ಷ್ ಮಾ|ಬಾ|ವಲೇರಿಯನ್ ಡಿಸೋಜಾ ಹಾಣಿ ಆಪುರ್ಬಾಯೆಚೊ ಆರ್ಥಾಭರಿತ್ ಸಂದೇಶ್ ದೀವ್ನ್ ಫೆಸ್ತಾಚೆ ಅಭಿನಂದನ್ ಪಾಟೈಲೆ. ಮಾನೆಸ್ತಿಣ್ ಲೂಸಿ ಲೋಬೊ ಆನಿ ಡೊ|ಕೆರೆನ್ ಡಿಸೋಜಾ ಹಾಣಿಂ ಕಾರ್ಯೆಂ ನಿರ್ವಹಣ್ ಕೆಲೆಂ. ಮಾನೆಸ್ತಿಣ್ ಜೋಯ್ಸ್ ಡಿಸೋಜಾನ್ ಧನ್ಯವಾದ್ ಅರ್ಪಿಲೆ.
ಉಪ್ರಾಂತ್ ಮನೋರಂಜನ್ ಕಾರ್ಯಕ್ರಮ್ ಚಲವ್ನ್ ವೆಲೆಂ. ಹ್ಯಾ ಮನೋರಂಜನಾಂತ್ ಸಂಗೀತ್, ನೃತ್ಯ್, ನಾಟ್ಕುಳೊ, ಜೋಕ್ಸ್, ಹೌಸಿ ಹೌಸಿ ಆನಿ ಇನ್ನಿತರ್ ಖೆಳ್ ಆಸಾ ಕೆಲ್ಲೆ. ಖೆಳಾಂತ್ ವಿಜೇತ್ ಜಾಲ್ಲ್ಯಾ ಸರ್ವಾಂಕ್ ಬಹುಮಾನ್ ವಿತರಣ್ ಕೆಲಿಂ. ಜೆವ್ಣಾಚೆರ್ ಆಶೀರ್ವಾದ್ ಮಾಗೊನ್ ಸರ್ವಾನಿಂ ಸಾಂಗಾತಾ ಮೆಳೊನ್ ವರ್ತ್ಯಾ ಸಂತೊಸಾನ್ ಜೆವಾಣ್ ಸ್ವೀಕಾರ್ ಕೆಲೆಂ.
ಫೆಸ್ತಾಚೆಂ ಮೀಸ್ ಭೆಟಯಿಲ್ಲ್ಯಾ ವಿಗಾರ್ ಬಾಪಾಂಚೊ, ಫೆಸ್ತ್ ಮಿಸಾಕ್ ಕಾಣಿಕ್ ಹಾಡ್‍ಲ್ಲ್ಯಾ ಸರ್ವಾಂಚೊ, ಆಮ್ಕಾಂ ಸಹಕಾರ್ ದಿಲ್ಲ್ಯಾ ಮಾನೆಸ್ತ್ ವಾಲ್ಟರ್ ನಜ್ರೆತ್ ಹಾಚೊ, ಸೈರ್ಯಾಂಚೊ, ಸರ್ವ್ ವಾಡ್ಯಾಚಾ ಗುರ್ಕಾರಾಂಚೊ, ಆಮ್ಚ್ಯಾ ಕೋರ್ ಸಮಿತಿಚಾ ಸಾಂದ್ಯಾಂಚೊ ಆನಿ ವಾಡ್ಯಾಚ್ಯಾ ಸರ್ವ್ ಸಾಂದ್ಯಾಂಚೊ ಹಾಂವ್ ಉಪ್ಕಾರ್ ಭಾವುಡ್ತಾಂ ಅನಿ ದೇವ್ ಬೊರೆಂ ಕರುಂ ಮ್ಹಣ್ತಾಂ.
ಗುರ್ಕಾರ್ನ್ – ಮಾನೆಸ್ತಿಣ್ ಮರಿಯಾ ಲೂವಿಸ್
ಜೆಜು ರಾಯ್ ವಾಡೊ