ಕ್ರೀಸ್ತಿ ಶಿಕ್ಷಣಾಚೊ ದಿವಸ್ 23.02.2020ಚ್ಯಾ ಸಕಾಳಿಂ 9.30 ವರಾಂಚ್ಯಾ ಮಿಸಾಚ್ಯಾ ಬಲಿದಾನಾಂ ಸವೆಂ ಸುರ್ವಾತ್ ಕೆಲಿ. ಸಾಂಜೆರ್ ಸಾಂಸ್ಕೃತಿಕ್ ಕಾರ್ಯಕ್ರಮ್ 5.00 ವೊರಾರ್ ಆರಂಭ್ ಕೆಲೆ. ಹರ್ಯೆಕಾ ಕ್ಲಾಸಿ ಥಾವ್ನ್ ಏಕ್ ಸಾಂಸ್ಕೃತಿಕ್ ಕಾರ್ಯೆಂ ಸಾದರ್ ಕೆಲೆಂ. ಉಪ್ರಾಂತ್ ಪರೀಕ್ಷೆಂತ್ ಪಯ್ಲೆ ಸ್ಥಾನ್ ಆನಿಂ ದುಸ್ರೆ ಸ್ಥಾನ್ ಆಪ್ಣಾಯಿಲ್ಲ್ಯಾಕ್, ದೊತೊರ್ನಿಕ್ ಚುಕನಾಸ್ತಾನಾ ಹಾಜರ್ ಜಾಲ್ಲ್ಯಾಂಕ್, ನೋಟ್ ಬುಕ್ ವ್ಯವಸ್ಥಿತ್ ರಿತಿನ್ ತಯಾರ್ ಕೆಲ್ಲ್ಯಾಂಕ್ ಭುರ್ಗ್ಯಾಂಕ್ ಇನಾಮಾಂ ವಾಂಟ್ಲಿ. ಅಶೆಂ ಸಗ್ಳೆಂ ವರಸ್ ಭುರ್ಗ್ಯಾಂಕ್ ತಾಂಚಾ ಆತ್ಮೀಕ್ ವಾಡಾವಳಿಕ್ ಆಧಾರ್ ಜಾವ್ನ್ ಜಾಯ್ತಿಂ ಕಾರ್ಯಕ್ರಮ್ ಫಿರ್ಗಜೆ ಥಾವ್ನ್ ಮಾಂಡುನ್ ಹಾಡ್ಲ್ಯಾಂತ್. ಭುರ್ಗ್ಯಾಂನಿಂ ವರ್ಸ್ ಭರ್ ಶಿಕ್‍ಲ್ಲೆ ಲಿಸಾಂವ್ ವಿವಿಧ್ ಕಾರ್ಯಕ್ರಮ ಮುಖಾಂತ್ರ್ ದಾಕೊಂವ್ಕ್ ಜಾಯ್ತಿ ಮ್ಹಿನತ್ ಕಾಡ್ಲ್ಯಾ.
ಹ್ಯಾ ಕ್ರೀಸ್ತಿ ಶಿಕ್ಷಣಾಚ್ಯಾ ಸಂಭ್ರಮಾಕ್ ಆಮ್ಚೆಚ್ ಫಿರ್ಗಜೆಚ್ಯೆ ಸಾಂ.ಲುವಿಸ್ ವಾಡ್ಯಾಚಿ ಮಾನೆಸ್ತಿನ್ ನ್ಯಾನ್ಸಿ ಮಿನೇಜಸ್ ಮುಕೆಲ್ ಸಯ್ರಿ ಜಾವ್ನ್ ಹಾಜರ್ ಆಸ್‍ಲ್ಲಿ. ಆಮಿ ಕಶೆಂ ಕ್ರೀಸ್ತಿ ಶಿಕ್ಷಣ್ ಜಿಯೆವ್ಯೆತ್ ಮ್ಹಳ್ಳೆ ಚಿಂತಾಪ್ ಆಮ್ಕಾಂ ದಿಲೆಂ. ಆಮ್ಚೆಂ ಕ್ರೀಸ್ತಿ ಶಿಕ್ಷಣ್ ಆಮ್ಚ್ಯಾ ಥಂಯ್ ವ್ಯರ್ಥ್ ಜಾಂವ್ಕ್ ನಜೊ ಬಗಾರ್ ಖರೊ ಪ್ರತಿಫಳ್ ದೀಂವ್ಕ್ ಜಾಯ್ ಮ್ಹಣ್ ಮ್ಹಳೆಂ. ಆಮ್ಚೊ ವಿಗಾರ್ ಬಾಪ್ ಮಾ.ಬಾ. ಜೋಸೆಫ್ ಲೋಬೊ ಹ್ಯಾ ಕಾರ್ಯಾಚೆಂ ಅಧ್ಯಕ್ಷ್ ಜಾವ್ನಾಸ್‍ಲ್ಲೆ. ಸಗ್ಳ್ಯಾ ವರ್ಸಾಂ ಕ್ರೀಸ್ತಿ ಶಿಕ್ಷಣ್ ಶಿಕೊವ್ನ್ ಭೋವ್ ಬರೆಂ ಕಾರ್ಯಕ್ರಮ್ ಮಾಂಡುನ್ ಹಾಡ್‍ಲ್ಲ್ಯಾಂಕ್ ತಶೆಂಚ್ ಸರ್ವ್ ಶಿಕ್ಷಕಾಂಕ್, ಆವಯ್-ಬಾಪಾಯ್ಕ್ ಅಭಿನಂದನ್ ಪಾಟಯ್ಲೆಂ. ಇನಾಮಾಂ ಆಪ್ಣಾಯಿಲ್ಲ್ಯಾಂಕ್ ಅಭಿನಂದನ್ ಪಾಟಯ್ಲೆಂ. ಮಾ.ಬಾ. ಅನಿಲ್ ಪಿಂಟೊ, ಸಹಾಯಕ್ ವಿಗಾರ್ ಬಾಪ್, ಮಾ.ಬಾ. ಕೆನೆತ್ ಕ್ರಾಸ್ತ, ITI Principal, Jeppu; ಮಾ.ಬಾ. ಮ್ಯಾಕ್ಸಿಮ್ ಡಿ’ಸೋಜ, Vice Principal, Milagres School; ಮಾ.ಬಾ. ಮೈಕಲ್ ಸಾಂತುಮಯೊರ್, Principal, Milagres College – ಹಾಜರ್ ಆಸ್‍ಲ್ಲೆ.
ಹ್ಯಾ ವೆದಿ ಕಾರ್ಯಾಚೆ ಕಾರ್ಯನಿರ್ವಾಹಾಕ್ ಸ್ಲೀಫಾ ಪಿಂಟೊ, ಸ್ವಾಗತ್ ಮಾ.ಬಾ.ಅನಿಲ್ ಪಿಂಟೊ, ವರ್ದಿ ಶ್ರೀಮತಿ ಸಿಂತಿಯ ಮಾರ್ಟಿಸ್, ಸಾಂಸ್ಕೃತಿಕ್ ಕಾರ್ಯಾಚೆಂ ಕಾರ್ಯನಿರ್ವಾಹಕ್ ಆ್ಯನ್ಸಿಟಾ ಡಿ’ಸೋಜ ಆನಿಂ ಎಮಿರಿಟಾ ಪರ್ಲ್, ಮಾನೆಸ್ತಿನ್ ಮೋಲಿ ಡಿ’ಸೋಜನ್ ಧನ್ಯವಾದ್ ಪಾಟಯ್ಲೆಂ. ಭೋವ್ ಉಲ್ಲಾಸಾನ್ ಕ್ರೀಸ್ತಿ ಶಿಕ್ಷಣಾಚೊ ದೀಸ್ ಆಚರ್ಸಿಲೊ.
ಸರ್ವ್ ಕ್ರೀಸ್ತಿ ಶಿಕ್ಷಣ್ ಶಿಕ್ಷಕಾಂಚಾ ನಿರಂತರ್ ವಾವ್ರ್ ಆನಿಂ ತಾಣಿಂ ದಿಲ್ಲ್ಯಾ ನಿಸ್ವಾರ್ಥ್ ಸೆವೆಕ್ ಹಾಂವ್ ಕಾಳ್ಜಾ ಥಾವ್ನ್ ದೇವ್ ಬರೆಂ ಕರುಂ ಮ್ಹಣ್ತಾ ಆನಿಂ ಮಿಲಾರ್ ಮಾಯೆಚೆಂ ವಿಂಚ್ಣಾರ್ ಆಶೀರ್ವಾದಾಂ ಮಾಗ್ತಾಂ.
ಕ್ರೀಸ್ತಿ ಶಿಕ್ಷಣ್ ಶಿಕ್ಷಕ್ ಆನಿಂ ಭುರ್ಗಿಂ
ಮಿಲಾರ್ ಫಿರ್ಗಜ್