ಸಪ್ತೆಂಬರಾಚಾ 9 ತಾರೀಕೆರ್ ಆಯ್ತಾರಾ ಸಾಂಜೆರ್ 5 ವರಾರ್ ಮಾನೆಸ್ತಿಣ್ ವೀರಾ ಡಿಸೋಜಾ, ಮಿಶನ್ ಕೌಂಪೌಂಡ್, ಬಲ್ಮಠ ಹಿಚಾ ಘರಾ ಜಮತ್ ಆನಿ ಮೊಂತಿ ಫೆಸ್ತ್ ಆಚರಣ್ ಕೆಲೆಂ.
ಆಮ್ಚೊ ಮಾನಾಧಿಕ್ ವಿಗಾರ್ ಬಾಪ್ ವಲೇರಿಯನ್ ಡಿಸೋಜಾ ಆನಿ ವಾಡ್ಯಾಂತ್ಲಿಂ 27 ಸಾಂದೆ ಹಾಜರ್ ಆಸ್‍ಲ್ಲೆ. ಮರಿಯಾ ಲುವಿಸಾನ್ ಸರ್ವಾಂಕ್ ಮೊಗಾಚೊ ಯೆವ್ಕಾರ್ ಮಾಗ್ಲೊ ಆನಿ ಸ್ವಾಗತ್ ದಿಲೊ.ಬಾಳೊಕ್ ಮರಿಯೆಚಿ ಇಮಾಜ್ ಫುಲಾಂನಿ ಸುಂರ್ಗಾರಾವ್ನ್, ದಿವ್ಯಾನಿಂ ಸಜಯ್ಲಿ. ಪ್ರೇರಕ್ ಜಾವ್ನ್ ಮಾನೆಸ್ತಿಣ್ ಲೂಸಿ ಲೋಬೊನ್ ಕಾರ್ಯೆಂ ಚಲವ್ನ್ ವ್ಹೆಲೆಂ.
ಮಾಗ್ಣ್ಯಾ ವಿಧಿಚಾ ಸುರ್ವೆರ್ “ಮರಿಯೆಕ್ ಹೊಗೊಳ್ಸಿಯಾಂ” ಗೀತ್ ಗಾಯ್ಲೆಂ ಆನಿ ಆಮ್ಚ್ಯಾ ವಾಡ್ಯಾಚಾ ಎಕ್ವಟಾ ಖಾತಿರ್ ಆನಿ ವಾಡ್ಯಾಂತ್ ಸೆವಾ ದಿಲ್ಲ್ಯಾ ಖಾತಿರ್ ಏಕ್ ಕಣ್ ತೇರ್ಸ್ ಭೆಟೈಲೊ. ದೆವಾಚೆ ಉತಾರ್ ಲೂಕ್ 1:46-56 ಮರಿಯೆಚೆಂ ಸ್ತುತಿಗೀತ್ ವಾಚುನ್ ನಿಯಾಳ್ ಕೆಲೊ. ಭಾವಾರ್ಥ್ಯಾಂಚಿಂ ಪ್ರಾರ್ಥನಾಂ ಭೆಟಯ್ಲ್ಯಾ ಉಪ್ರಾಂತ್ ಬಾಳೊಕ್ ಮರಿಯೆಚೆಂ ನೊವೆನಾಚೆಂ ಮಾಗ್ಣೆಂ ಕೆಲೆಂ. ಉಪ್ರಾಂತ್ “ಸಕ್ಕಡ್ ಸಾಂಗಾತಾ ಮೆಳ್ಯಾಂ” ಗೀತಾ ಸವೆಂ ಹಾಜರ್ ಆಸ್‍ಲ್ಲ್ಯಾ ಸಮೇಸ್ತಾನಿಂ ಬಾಳಕ್ ಮರಿಯೆಕ್ ಫುಲಾಂ ಅರ್ಪುನ್ ಮಾನ್ ಕೆಲೊ. ಉಪ್ರಾಂತ್ ಆವ್ಮರಿ ಕೆಲಿ. ಬೆಂಜಾರ್ ಕೆಲ್ಲೆಂ ನವೆಂ ಗುರ್ಕಾರ್ನಿನ್ ಪಿಟೊ ಕರ್ನ್ ವೊರ್ನಾಂತ್ ಭೊರ್ಸುನ್ ಸಮೇಸ್ತಾಂಕ್ ವಾಂಟ್ಲೆಂ.
ವಿಗಾರ್ ಬಾಪಾನಿಂ ಮರಿಯೆ ಮಾಯೆ ವಿಷ್ಯಾಂತ್ ಸಂದೇಶ್ ದಿಲೊ. ಮರಿಯೆಚಿ ತೀನ್ ಫೆಸ್ತಾಂ ಆಮಿ ಆಚರ್ಸಿತಾಂವ್. ಡಿಸೆಂಬರಾಚಾ 8 ತಾರಿಕೆರ್ ಖತಾವಿಣ್ ಗರ್ಭಿಸಂಭವ್ಣೆಚೆಂ ಫೆಸ್ತ್, ಸಪ್ತೆಂಬರಾಚಾ 8 ತಾರೀಕೆರ್ ತಿಚೊ ಜಲ್ಮಾ ದಿವಸ್ ಆನಿ ಅಗೋಸ್ತಾಚಾ 15 ತಾರೀಕೆರ್ ಸ್ವರ್ಗಾವ್ಹರಣಾಚೆಂ ಫೆಸ್ತ್ ಆಚರ್ಸಿತಾಂವ್. ಮರಿಮಾಯೆಕ್ ಭೆಟವ್ನ್ ದಿಲ್ಲ್ಯಾ ಇಗರ್ಜೆಂಚೊ ಉಲ್ಲೇಖ್ ಕೆಲೊ. ಆಮ್ಕಾಂ ಹರ್ಯೇಕಾ ಕ್ರಿಸ್ತಾಂವಾಕ್ ತೀನ್ ಮಾಂಯೊ ಆಸಾತ್. ಪಯ್ಲಿ ಮರಿ ಮಾಂಯ್, ದುಸ್ರಿ ಆಮ್ಚಿ ಆವಯ್ ಆನಿ ತಿಸ್ರಿ ಪ್ರಥ್ವಿ/ಭುಂಯ್. ಆಮಿ ಆಮ್ಚ್ಯಾ ಪ್ರಥಿಚೆಂ ಪರಿಸರ್ ಸಾಂಬಾಳ್ಚೆಂ ಆಮ್ಚೆಂ ಕರ್ತವ್ಯ್ ಜಾವ್ನಾಸಾ. ಆಜ್ ಆಮ್ಚ್ಯಾ ಪರಿಸರಾಂತ್ ಉದಾಕ್, ವಾರೆಂ, ಖಾಣ್ ವಿಕಾಳ್ ಜಾಂವ್ಕ್ ಪಾವ್ಲಾಂ. ಆನಿ ಮರಿ ಕಸೊ ಆಮ್ಚೊ ಮೋಗ್ ಕರ್ತಾ ಮ್ಹಣ್ ವಿವರಿಸಿಲೆಂ.
ಸಪ್ತೆಂಬರ್ ಮಹಿನ್ಯಾಂತ್ ಜಲ್ಮಾ ದಿವಸ್ ಆಸ್‍ಲ್ಲ್ಯಾಂಕ್ ಗೀತಾ ದ್ವಾರಿಂ ಉಲ್ಲಾಸ್ ಪಾಠೈಲೆ. ಹೌಸಿ ಹೌಸಿ ಖೆಳ್ ಆನಿ ಇತರ್ ಖೆಳ್ ಚಲವ್ನ್ ಜಿಕ್‍ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ.ಮಾನೆಸ್ತಿಣ್ ಜೋಯ್ಸ್ ಡಿಸೋಜಾನ್ ಧನ್ಯವಾದ್ ಸಮರ್ಪಣ್ ಕೆಲೆ. “ಭೊಡ್ವ್ಯಾ ಸಂಗಿಂ ಕರ್ಯಾಂ ನಮಾನ್” ಗೀತ್ ಗಾವ್ನ್ ಮಾಗ್ಣ್ಯಾ ವಿಧಿ ಆಖೇರ್ ಕೆಲಿ.
ಮಾನೆಸ್ತಿಣ್ ವೀರಾ ಡಿಸೋಜಾನ್ ಥಂಡ್ ಪೀವನ್ ಆನಿ ಫಳಾರ್ ದೀವ್ನ್ ಧಾದೊಸ್ ಕೆಲೆಂ. ತಶೆಂಚ್ ವೀರಾಚೊ ಆನಿ ತಾಚಾ ಕುಟ್ಮಾಚೊ ಆನಿ ಸರ್ವಾಂಚೊ ಗುರ್ಕಾರ್ನಿನ್ ಉಪ್ಕಾರ್ ಭಾವುಡ್ನ್ ಆಮ್ಚೆಂ ಫೆಸ್ತಾಚೆಂ ಆಚರಣ್ ಸಂಪಯ್ಲೆಂ.
ಮಾನೆಸ್ತಿಣ್ ಮರಿಯಾ ಲುವಿಸ್
ಗುರ್ಕಾರ್ನ್ – ಜೆಜು ರಾಯ್ ವಾಡೊ