ಸಪ್ಟೆಂಬರಾಚಾ 23 ತಾರೀಕೆರ್ ಆಯ್ತಾರಾ ದಿಸಾ ಸಾಂಜೆರ್ 6.00 ವರಾರ್ ಮಾನೆಸ್ತಿಣ್ ಮೀನಾ ಮಲಾನಿ ಹಿಚಾ ಘರಾ ವಾಡ್ಯಾಗಾರಾಂ ಸಾಂಗಾತಾ ಮೆಳೊನ್ ವಾಡ್ಯಾಚಿ ಜಮಾತ್ ಆನಿ ಮೊಂತಿಫೆಸ್ತ್ ಆಚರಣ್ ಕೆಲೆಂ.
ಮಾನೆಸ್ತಿಣ್ ಮೀನಾ ಮಲಾನಿನ್ ಹಾಜರ್ ಜಾಲ್ಲ್ಯಾ ವಿಗಾರ್ ಬಾಪಾಂಕ್, ಬೆಥನಿ ಕಾನ್ವೆಂಟಾಚಾ ಧರ್ಮ್‍ಭಯ್ಣಿಂಕ್, ವೆಲಂಕಣಿ ವಾಡ್ಯಾಚಿ ಗುರ್ಕಾರ್ನ್ ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸ್ ಹಿಕಾ, ವಾಡ್ಯಾ ಪ್ರತಿನಿಧಿಂಕ್ ತಶೆಂಚ್ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ.
ಮರ್ಯೆ ಮಾಯೆಚೆ ಗೀತ್ ಗಾವ್ನ್ ಜಮಾತ್ ಆರಂಭ್ ಕೆಲಿ. ಮಾಗ್ಣ್ಯಾ ವಿಧಿಂತ್ ಪ್ರಸ್ತಾವನ್, ದೆವಾಚೆ ಉತಾರ್, ನಿಯಾಳ್, ಭಾವಾರ್ಥ್ಯಾಂಚಿಂ ಪ್ರಾರ್ಥನಾಂ, ಬಾಳೊಕ್ ಮರ್ಯೆಚೆಂ ನೊವೆನ್ ಆನಿ ವಾಡ್ಯಾಚಾ ಎಕ್ವಟಾ ಖಾತಿರ್ ತೇರ್ಸ್ ಭೆಟಯ್ಲೊ. ಹಾಜರ್ ಜಾಲ್ಲ್ಯಾ ಸರ್ವಾಂನಿ ಬಾಳೊಕ್ ಮರ್ಯೆಕ್ ಫುಲಾಂ ಅರ್ಪಿಲಿಂ. ಉಪ್ರಾಂತ್ ದೆವಾಕ್ ಅರ್ಗಾಂ ಗೀತ್ ಗಾವ್ನ್ ಸರ್ವಾಂನಿ ವೊರ್ನಾಂತ್ ನೊವೆಂ ಸೆವ್ಲೆಂ.
ಉಪ್ರಾಂತ್ ಗುರ್ಕಾರಾನ್ ಜಮಾತ್ ಮುಂದರ್ಸುನ್ ವೆಲಿ. ವಾಡ್ಯಾಂತ್ ತಾಚೆ ಸಾಂಗಾತಾ ವಾವ್ರ್ ಕರ್ಚ್ಯಾ ವಾಡ್ಯಾ ಪ್ರತಿನಿಧಿ ಮಾನೆಸ್ತಿಣ್ ಲೋನಾ ಪಿಂಟೊ ಆನಿ ಮಾನೆಸ್ತ್ ಬರ್ನಾರ್ಡ್ ಸೊಜ್, ಏರಿಯಾ ಲೀಡರ್ ಮಾನೆಸ್ತಿಣ್ ಜೆಸ್ಸಿಂತಾ ಫೆರ್ನಾಂಡಿಸ್, ಮಾನೆಸ್ತ್ ಜೋನ್ ಡಿಸೋಜ ಆನಿ ಖಜನ್ದಾರ್ ಮೋಲಿ ಡಿಸೋಜ ಹಾಂಕಾಂ ಗುರ್ಕಾರಾನ್ ತಾಚಾ ತರ್ಫೆನ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ. ಮಾಗ್ಣ್ಯಾವಿಧಿಂತ್ ಅಧಿಕ್ ಸಂಖ್ಯಾನ್ ಭುರ್ಗ್ಯಾಂನಿಂ ಪಾತ್ರ್ ಘೆತ್ಲೆಂ. ಹಾಜರ್ ಜಾಲ್ಲ್ಯಾ ವಿಗಾರ್ ಬಾಪಾನ್ ಭೋವ್ ಆಪುರ್ಬಾಯೆಚೊ ಸಂದೇಶ್ ಆಮ್ಕಾಂ ದಿಲೊ.
ವಾಡ್ಯಾಂತ್ಲ್ಯಾ ಸರ್ವ್ ಶಿಕ್ಷಕಿಂಕ್ Teachers Day ತರ್ಫೆನ್ ಉಲ್ಲಾಸ್ ಪಾಟೈಲೆ ಆನಿ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ. ಸಪ್ಟೆಂಬರ್ ಮಹಿನ್ಯಾಂತ್ ಜಲ್ಮಾದಿವಸ್ ಆಚರ್ಸಿತೆಲ್ಯಾಂಕ್ ಉಲ್ಲಾಸ್ ಪಾಟವ್ನ್ Gift ದೀವ್ನ್ ಮಾನ್ ಕೆಲೆಂ. ಹೌಸಿ ಹೌಸಿ ಚಲವ್ನ್ ವೆಲೆಂ ಆನಿ ಜಿಕ್‍ಲ್ಲ್ಯಾಂಕ್ ಇನಾಮಾಂ ದೀವ್ನ್ ಅಭಿನಂದನ್ ಪಾಟೈಲೆ.
ಮಾನೆಸ್ತ್ ಬರ್ನಾರ್ಡ್ ಸೊಜಾನ್ ಧನ್ಯವಾದ್ ಪಾಟೈಲೆ ಆನಿ ಹಾಜರ್ ಜಾಲ್ಲ್ಯಾ ಸರ್ವಾಂನಿ ಸಾಂಗಾತಾ ಜೆವಾಣ್ ಸೆವ್ಲೆಂ.
ಶ್ರೀಮತಿ ಜಸಿಂತಾ ಫೆರ್ನಾಂಡಿಸ್