ಜುಲಾಯ್ 4, 5 ಆನಿ 6, ಬ್ರೆಸ್ತಾರಾ, ಸುಕ್ರಾರಾ ಆನಿ ಸನ್ವಾರಾ ತೀನ್ ದಿಸಾಂಚೆ ನೊವೆನ್, ಮಿಸಾಚೆ ಬಲಿದಾನಾ ಮುಕಾಂತ್ರ್ ಫೆಸ್ತಾಕ್ ಅತ್ಮೀಕ್ ತಯಾರಾಯ್ ಕೆಲಿ. 8 ವರಾಂಚೆರ್ ಫೆಸ್ತಾಕ್ ಮುಡ್ದೊಮ್ ರಾವ್‍ಲ್ಲ್ಯಾಂಕ್ ಮಾನಾಚ್ಯೊ ವಾತಿ ವಾಂಟ್ಲ್ಯಾ ಉಪ್ರಾಂತ್ ಫೆಸ್ತಾಚೆ ಸಂಭ್ರಮಿಕ್ ಮಿಸಾಚೆ ಬಲಿದಾನ್ ಆರಂಭ್ ಜಾಲೆಂ. ಪ್ರಧಾನ್ ಯಾಜಕ್ ಜಾವ್ನ್ ವಿಗಾರ್ ಬಾಪ್ ಜೋಸೆಫ್ ಜೆ. ಲೋಬೊ ಹಾಣಿ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಮಾ|ಬಾ|ಲಿಯೊ ಲಸ್ರಾದೊ, ಸಾಂ. ಜುಜೆ ಸೆಮಿನರಿಚೊ ಆಡಳ್ತೆದಾರ್ ಆನಿ ಪ್ರಾಧ್ಯಾಪಕ್ ಹಾಣಿ ಆಮಿ ದಿಂವ್ಚ್ಯಾ ಸೆವೆವಿಶ್ಯಾಂತ್ ಅರ್ಥಾಭರಿತ್ ಶೆರ್ಮಾಂವ್ ದಿಲೊ. ಆಮ್ಚ್ಯಾ ಫಿರ್ಗಜಿಚ್ಯಾ ಸರ್ವ್ ಯಾಜಕಾಂನಿ ಆನಿ ಸೈರೆ ಯಾಜಕಾಂನಿ ಸಹಭೆಟವ್ಣಿ ಕೆಲಿ. ಮಿಲಾರ್ ಮಾಯ್ ಆಮ್ಚಿ ಪಾತ್ರೊನ್ ಜಾವ್ನ್ ಮೆಳ್‍ಲ್ಲಿ ಆಮಿ ಭಾಗಿ ಜಾವ್ನಾಸಾಂವ್. ಮರಿಯೆ ಮಾಯೆ ಮುಕಾಂತ್ರ್ ಆಮ್ಚೆರ್ ವೊತ್‍ಲ್ಲ್ಯಾ ಸರ್ವ್ ಕುರ್ಪೆ ದೆಣ್ಯಾಂ ಪಾಸತ್ ಆನಿ ಶಾಬಿತಾಯೆನ್ ಆಮ್ಕಾಂ ರಾಕೊನ್ ಆಮ್ಚೊ ಭಾವಾರ್ಥ್ ಥಿರ್ ಸಾಂಬಾಳುಂಕ್ ಆಧಾರ್ ದಿಲ್ಲೆ ಖಾತಿರ್ ಧನ್ಯಾ ದೆವಾಕ್ ಫಿರ್ಗಜ್ ಏಕ್ ಕುಟಾಮ್ ಜಾವ್ನ್ ಆಮಿ ಅರ್ಗಾಂ ದಿಲಿ. ವಿಗಾರ್ ಬಾಪ್ ಮಾ|ಬಾ|ಜೋಸೆಫ್ ಲೋಬೊ ಹಾಣಿ ಫೆಸ್ತಾಚೆ ಆಚರಣ್ ಅರ್ಥಾಭರಿತ್ ಜಾಂವ್ಕ್ ಆಧಾರ್ ದಿಲ್ಲ್ಯಾ ಸಮೆಸ್ತಾಂಚೊ ಉಪ್ಕಾರ್ ಭಾವುಡ್ಲೊ.
