ಮಿಲಾರ್ ಮಾಯೆಕ್ ಮಾನ್ ಕರ್ನ್ ಜುಲಾಯ್ 8 ತಾರೀಕೆರ್ ಆಯ್ತಾರಾ ದಿಸಾ ಆಮ್ಚ್ಯಾ ಫಿರ್ಗಜ್ ಕುಟ್ಮಾಚೆಂ ಫೆಸ್ತ್ ಆಚರಣ್ ಕೆಲೆಂ.
ಜುಲಾಯ್ 5, 6 ಆನಿ 7, ಬ್ರೆಸ್ತಾರಾ, ಸುಕ್ರಾರಾ ಆನಿ ಸನ್ವಾರಾ ತೀನ್ ದಿಸಾಂಚೆ ನೊವೆನ್, ಮಿಸಾಚೆ ಬಲಿದಾನಾ ಮುಕಾಂತ್ರ್ ಫೆಸ್ತಾಕ್ ಅತ್ಮೀಕ್ ತಯಾರಾಯ್ ಕೆಲಿ. 8 ವರಾಂಚೆರ್ ಫೆಸ್ತಾಕ್ ಮುಡ್ದೊಮ್ ರಾವ್‍ಲ್ಲ್ಯಾಂಕ್ ಮಾನಾಚ್ಯೊ ವಾತಿ ವಾಂಟ್ಲ್ಯಾ ಉಪ್ರಾಂತ್ ಫೆಸ್ತಾಚೆ ಸಂಭ್ರಮಿಕ್ ಮಿಸಾಚೆ ಬಲಿದಾನ್ ಆರಂಭ್ ಜಾಲೆಂ. ಪ್ರಧಾನ್ ಯಾಜಕ್ ಜಾವ್ನ್ ಮಾ|ಬಾ|ದೊ|ಅಂತೊನ್ ಜೊರ್ಜ್ ಪಿಂಟೊ ಹಾಣಿ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಅರ್ಥಾಭರಿತ್ ಶೆರ್ಮಾಂವ್ ದಿಲೊ. ಮಿಲಾರ್ ಮಾಯ್ ಆಮ್ಚಿ ಪಾತ್ರೊನ್ ಜಾವ್ನ್ ಮೆಳ್‍ಲ್ಲಿ ಆಮಿ ಭಾಗಿ ಜಾವ್ನಾಸಾಂವ್. ಮರಿಯೆ ಮಾಯೆ ಮುಕಾಂತ್ರ್ ಆಮ್ಚೆರ್ ವೊತ್‍ಲ್ಲ್ಯಾ ಸರ್ವ್ ಕುರ್ಪೆ ದೆಣ್ಯಾಂ ಪಾಸತ್ ಆನಿ ಶಾಬಿತಾಯೆನ್ ಆಮ್ಕಾಂ ರಾಕೊನ್ ಆಮ್ಚೊ ಭಾವಾರ್ಥ್ ಥಿರ್ ಸಾಂಬಾಳುಂಕ್ ಆಧಾರ್ ದಿಲ್ಲೆ ಖಾತಿರ್ ಧನ್ಯಾ ದೆವಾಕ್ ಫಿರ್ಗಜ್ ಏಕ್ ಕುಟಾಮ್ ಜಾವ್ನ್ ಆಮಿ ಅರ್ಗಾಂ ದಿಲಿ. ವಿಗಾರ್ ಬಾಪ್ ಮಾ|ವಲೇರಿಯನ್ ಸೊಜ್ ಹಾಣಿ ಫೆಸ್ತಾಚೆ ಆಚರಣ್ ಅರ್ಥಾಭರಿತ್ ಜಾಂವ್ಕ್ ಆಧಾರ್ ದಿಲ್ಲ್ಯಾ ಸಮೆಸ್ತಾಂಚೊ ಉಪ್ಕಾರ್ ಭಾವುಡ್ಲೊ.