ದಸೆಂಬರ್ 24 ತಾರಿಕೆರ್ ಸಾಂಜೆರ್ 7.00 ವರಾರ್ ಬಾಯ್ರ್ ಉಗ್ತ್ಯಾ ಮೈದಾನಾರ್ ನತಾಲಾಂಚ್ಯಾ ಗಿತಾಂ (ಕ್ಯಾರಲ್ಸ್) ದ್ವಾರಿಂ ನತಾಲಾಂ ಫೆಸ್ತಾಚೆಂ ಆರಂಭ್ ಕೆಲೆಂ. ವಿಗಾರ್ ಬಾಪ್ ಮಾ|ವಲೇರಿಯನ್ ಸೊಜ್ ಹಾಣಿ ಗರ್ದಾನಾಚೊ ಗೊಟೊ ಬೆಂಜಾರ್ ಕೆಲೊ. ಸಹಾಯಕ್ ವಿಗಾರ್ ಬಾಪ್ ಮಾ|ಎಡ್ವಿನ್ ಮೊನಿಸ್ ಹಾಣಿ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಾ|ಬಾ|ಮ್ಯಾಕ್ಸಿ ಸೊಜ್ ಹಾಣಿ ವಿವಿಧ್ ಘಡಿತಾಂ ದ್ವಾರಿಂ ಕಶೆಂ ಜೆಜು ಆಮ್ಚ್ಯಾ ಕಾಳ್ಜಾಂನಿ, ಕುಟ್ಮಾಂನಿ ಆನಿ ಸಮಾಜೆಂತ್ ಜಲ್ಮೊಂಕ್ ಆಶೆತಾ ಮ್ಹಳ್ಳ್ಯಾ ವಿಶ್ಯಾಂತ್ ಶೆರ್ಮಾಂವ್ ದಿಲೊ. ಮಾ|ಬಾ|ಮೈಕಲ್ ಸಾಂತುಮಾಯೆರ್, ಮಾ|ಬಾ|ವಿಲಿಯಂ ಗೊನ್ಸಾಲ್ವಿಸ್ ಹಾಣಿ ಸಹಭೆಟವ್ಣಿ ಕೆಲಿ. ಮಿಸಾ ಉಪ್ರಾಂತ್ ಕ್ರಿಸ್ಮಸಾಚಿ ಕೇಕ್ ಕಾತ್ರುಂಕ್ ಫಿರ್ಗಜ್ ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಶಿಣ್ ಮಾನೆಸ್ತಿಣ್ ಸಿಸಿಲಿಯಾ ಪಿರೇರಾ, ಕಾರ್ಯದರ್ಶಿ ಮಾನೆಸ್ತ್ ಐವನ್ ಫೆರ್ನಾಂಡಿಸ್ ಆನಿ ಸಾಂ. ತೊಮಾಸ್ ವಾಡ್ಯಾಂತ್ಲ್ಯಾ ಮಾನೆಸ್ತ್ ಜೊಯೆಲ್ ಮಾರ್ಟಿಸಾನ್ ಸಾಂಗಾತ್ ದಿಲೊ. ಉಪ್ರಾಂತ್ ಸರ್ವಾಂಕ್ ಕ್ರಿಸ್ಮಸಾಚಿ ಕೇಕ್ ಆನಿ ಥಂಡ್ ಪೀವನ್ ವಾಂಟ್ಲೆಂ. ಚಡುಣೆಂ ಚಾರ್ ಹಜಾರ್ ಲೋಕ್ ಹಾಜರ್ ಆಸ್‍ಲ್ಲೊ.
