ಹೊ ದೀಸ್ ಆಮಿ ಸಕಾಳಿಂ 7.00 ವರಾಂಚ್ಯಾ ಅರ್ಗಾಂ ಮಿಸಾ ಸವೆಂ ಆರಂಭ್ ಕೆಲೊ. ಮಿಸಾಚಾ ಸುರ್ವೆರ್ ಗುರ್ಕಾರ್, ಕುಮ್ಗಾರ್ ವಾಂಟ್ಚೆ ಮಣಿಯಾರಿ, ಆಲ್ತಾರ್ ಭುರ್ಗೆ ಆನಿ ಫಿರ್ಗಜ್ ಯಾಜಾಕ್ ಪುರ್ಶಾಂವಾರ್ ಆಯಿಲ್ಲ್ಯಾಂವ್. ಪ್ರಧಾನ್ ಯಾಜಾಕ್ ಜಾವ್ನ್ ಸೆಮಿನರಿಚೆ ಪ್ರಾಧ್ಯಾಪಕ್ ಮಾ|ಬಾ|ರೊನಾಲ್ಡ್ ಸೆರಾವೊ ಹಾಣಿ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಅಮ್ಚ್ಯಾ ಫಿರ್ಗಜ್ ಯಾಜಾಕಾಂನಿ ಸಹಭೆಟವ್ಣಿ ಕೆಲಿ.
ಫಿರ್ಗಜ್‍ಗಾರಾಂ ಸಾಂಗಾತಾ ಮೆಳೊನ್ ರಾಂದಪ್:
ಅಮ್ಚ್ಯಾ ಸುಮಾರ್ 50 ಫಿರ್ಗಜ್‍ಗಾರಾಂನಿ ಸಾಂಗಾತಾ ಮೆಳೊನ್ ಶಿತ್, ಸಾರ್, ದುಕ್ರಾಮಾಸ್, ಕುಂಕ್ಡಾಚೆಂ ಸುಕ್ಕ, ಚಣೆ ಸುಕೆ ಆನಿ ವೋರ್ನ್ ಅತ್ತಾವರ್ ಪಿರೇರಾ ಕೌಂಪೌಂಡ್ (ಆ್ಯರನ್ ಕ್ಯಾಟರರ್ಸ್) ಹಾಂಗಾಸರ್ 700 ಜಣಾಂಚೆಂ ಜೆವಾಣ್ ಸಾಂಗಾತಾ ಮೆಳೊನ್ ಶ್ರೀ| ನೈಜಿಲ್ ಪಿರೇರಾ ಆನಿ ಶ್ರೀ| ಐವನ್ ಡಿಸೋಜಾಚ್ಯಾ ಮುಖೆಲ್ಪಣಾರ್ ರಾಂದ್ಲೆಂ.
ವೆದಿ ಕಾರ್ಯೆಂ ಆನಿ ಸಾಂಸ್ಕ್ರತಿಕ್ ಕಾರ್ಯೆಂ:
ಹೆಂ ಕಾರ್ಯೆಂ ಮಿಲಾಗ್ರಿಸ್ ಜುಬಿಲಿ ಹಾಲ್ ಹಾಂಗಾಸರ್ ಸಾಂಜೆರ್ 5.30 ವರಾರ್ ಆಸಾ ಕೆಲ್ಲೆಂ. ಆಮ್ಚ್ಯಾ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊನ್ಸಿಝೊರ್ ಭೋವ್ ಮಾ|ಬಾ|ಮ್ಯಾಕ್ಸಿಂ ನೊರೊನ್ಹಾ ಮುಖೆಲ್ ಸೈರೊ ಜಾವ್ನ್ ಆಸ್‍ಲ್ಲೊ. ಮಿಲಾರ್ಚ್ಯಾ ಕೊಂಕ್ಣಿ Choir ಪಂಗ್ಡಾನ್ ಪ್ರಾರ್ಥನ್ ಗೀತ್ ಗಾವ್ನ್ ಕಾರ್ಯಾಚಿ ಸುರ್ವಾತ್ ಕೆಲಿ. ವೆದಿಚೆರ್ ವಿಗಾರ್ ಮಾ|ಬಾ|ವಲೇರಿಯನ್ ಡಿಸೋಜ, ಸಹಾಯಕ್ ವಿಗಾರ್ ಮಾ|ಬಾ|ಎಡ್ವಿನ್ ಮೊನಿಸ್, ಮುಖೆಲ್ ಸೈರೊ ಮೊನ್ಸಿಝೊರ್ ಭೋವ್ ಮಾ|ಬಾ|ಮ್ಯಾಕ್ಸಿಂ ನೊರೊನ್ಹಾ, ಫಿರ್ಗಜ್ ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷ್ ಶ್ರೀಮತಿ ಸಿಸಿಲಿಯಾ ಪಿರೇರಾ, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಕಾರ್ಯದರ್ಶಿ ಶ್ರೀ|ಐವನ್ ಫೆರ್ನಾಂಡಿಸ್, ಕಾರ್ಯಾಚೆ ಸಂಚಾಲಕ್ ಶ್ರೀ|ನೈಜಿಲ್ ಪಿರೇರಾ, ಮಿಲಾರ್ ಕೊಲೆಜಿಚೊ Principal ಮಾ|ಬಾ|ಮೈಕಲ್ ಸಾಂತುಮಾಯೆರ್, ಮಿಲಾರ್ ಹೈಸ್ಕೂಲಾಚೆ Vice-Principal, ಮಾ|ಬಾ|ಮ್ಯಾಕ್ಸಿ ಡಿಸೋಜ ಹಾಜಾರ್ ಆಸೊನ್ ವೆದಿ ಸೊಬೈಲಿ. ವಿಗಾರ್ ಬಾಪ್ ವಲೇರಿಯನ್ ಡಿಸೋಜ ಹಾಣಿ ವೆದಿರ್ ಆಸ್‍ಲ್ಲ್ಯಾಂಕ್ ಆನಿ ವೆದಿ ಮುಖಾರ್ ಆಸ್‍ಲ್ಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ. ಕಾರ್ಯದರ್ಶಿ ಶ್ರೀ|ಐವನ್ ಫೆರ್ನಾಂಡಿಸಾನ್ ಫಿರ್ಗಜೆಂತ್ ಸಗ್ಳ್ಯಾ ವರ್ಸಾ ಜಾಲ್ಲ್ಯಾ ಕಾರ್ಯಾಂಚಿಂ ಆನಿ ವಾವ್ರಾವಿಶಿಂ ವರ್ದಿ ಮಂಡನ್ ಕೆಲಿ.
ಮಾನ್ ಸನ್ಮಾನ್:
ಶಿಕ್ಪಾಂತ್, ದಿಯೆಸೆಜಿಚ್ಯಾ ದೊತೊರ್ನಿಚಾ ಪರೀಕ್ಷೆಂತ್, ಖೆಳಾಂತ್, ವೃತ್ತಿಪರ್ ಕೋರ್ಸಾಂತ್ ಅತ್ಯಧಿಕ್ ಅಂಕ್ ಜೊಡ್‍ಲ್ಲ್ಯಾ ತಶೆಂಚ್ ವಿವಿಧ್ ಕ್ಷೇತ್ರಾಂತ್ ರಾಜ್ಯ್, ರಾಷ್ಟ್ರೀಯ್, ಜಿಲ್ಲಾ ಮಟ್ಟಾರ್ ಸಾಧಾನ್ ಕೆಲ್ಲ್ಯಾ ಅಮ್ಚ್ಯಾ ಫಿರ್ಗಜೆಚ್ಯಾ ಭುರ್ಗ್ಯಾಂಕ್ ಆನಿ ನಿವೃತ್ತ್ ಜಾಲ್ಲ್ಯಾ ಗುರ್ಕಾರಾಂಕ್ ಮಾನ್ ಕೆಲೊ. ಶ್ರೀ ಸ್ಟ್ಯಾನಿ ಬಾರೆಟ್ಟೊನ್ ತಾಚ್ಯಾ ನಾಂವಾನ್ ತೆಗಾಂ ಭುರ್ಗ್ಯಾಂಕ್ ರು. 10,000/-ಲೆಖಾನ್ Scholarship ವಾಂಟ್ಲೆ.
ಮುಖೆಲ್ ಸೈರೊ ವಿಗಾರ್ ಜೆರಾಲ್ ಮಾ|ಬಾ| ಮ್ಯಾಕ್ಸಿಂ ನೊರೊನ್ಹಾ ಹಾಣಿಂ ತಾಂಚೊ ಸಂದೇಶ್ ದಿಲೊ. ಆನಿ ಉಪಾಧ್ಯಕ್ಷ್ ಶ್ರೀಮತಿ ಸಿಸಿಲಿಯಾ ಪಿರೇರಾನ್ ಕುಟ್ಮಾ ದಿಸಾ ಖಾತಿರ್ ವಾವ್ರ್ ಕೆಲ್ಲ್ಯಾ ಸರ್ವಾಂಕ್ ದೇವ್ ಬೊರೆಂ ಕರುಂಕ್ ಮ್ಹಳೆಂ. ವೆದಿ ಕಾರ್ಯೆಂ ಶ್ರೀಮತಿ ಹಿಲ್ಡಾ ಡಿಸೋಜಾನ್ ಚಲೊವ್ನ್ ವ್ಹೆಲೆಂ.
ಸಾಂಸ್ಕ್ರತಿಕ್ ಕಾರ್ಯೆಂ:
ಆಮ್ಚ್ಯಾ ಫಿರ್ಗಜೆಚ್ಯಾ ಭುರ್ಗ್ಯಾಂನಿ ಆನಿ ಯುವಜಣಾಂನಿ ನಾಸ್ ಆನಿ ಪದಾ ಸವೆಂ ತಾಂಚಿಂ ತಾಲೆಂತಾ ಪ್ರದರ್ಶಿಲಿಂ ಆನಿ ಲೊಕಾಚಿಂ ಮನಾಂ ದಾಧೊಸ್ ಕೆಲಿಂ. ಆಮ್ಚ್ಯಾ ಫಿರ್ಗಜೆಚ್ಯಾ ಸ್ತ್ರೀಯಾಂ ಥಾವ್ನ್ ಪಾವ್ಸ್ ಯೆಂವ್ಚೊ ಜಾಲಾ ಹ್ಯಾ ಪದಾಚೊ ನಾಸ್ ವಿಶೇಸ್ ಆಕರ್ಶಣ್ ಜಾವ್ನ್ ಆಸ್‍ಲ್ಲೆಂ ಆನಿ ಬೆಸ್ಟೆಂ ಘಡ್ಬಿಡಿ ಹ್ಯಾಸ್ಯಾಂ ನಾಟ್ಕುಳೊ ಸಕ್ಡಾಂಚಿ ಮನಾಂ ಜಿಕುಂಕ್ ಸಕ್ಲೊ. ಸಾಂಸ್ಕ್ರತಿಕ್ ಕಾರ್ಯೆಂ ಶ್ರೀ| ಆ್ಯರನ್ ಲೋಬೊನ್ ಚಲೊವ್ನ್ ವ್ಹೆಲೆಂ.
ನಿಮಾಣೆಂ ಫಿರ್ಗಜ್‍ಗಾರಾಂನಿ ಸಾಂಗಾತಾ ಮೆಳೊನ್ ರಾಂದ್‍ಲ್ಲ್ಯಾ ಜೆವ್ಣಾ ಸವೆಂ ಕಾರ್ಯೆಂ ಸಂಪೈಲೆಂ.
ಹ್ಯಾ ಕಾರ್ಯಾಕ್ 750 ಫಿರ್ಗಜ್‍ಗಾರಾಂ ಹಾಜಾರ್ ಆಸ್‍ಲ್ಲಿಂ ಆನಿ ಸರ್ವಾಂ ದಾಧೊಶಿ ಜೇವ್ನ್ ಘರಾಂ ಪಾಟಿಂ ಗೆಲಿಂ.
ಜೈ ಕ್ರಿಸ್ತಾಕ್ ಲಾಂಬ್ ಜಿಯೊ ಮಿಲಾರ್ ಮಾಯೆಚಿ ಫಿರ್ಗಜ್, ಮಂಗ್ಳುರ್
ಶ್ರೀ|ನೈಜಿಲ್ ಪಿರೇರಾ
ಕಾರ್ಯಾಚೊ ಸಂಚಾಲಕ್
ಗುರ್ಕಾರ್ – ಸಾಂ. ಜುಜೆ ವಾಡೊ