ಜೂನಾಚ್ಯಾ 29 ತಾರೀಕೆರ್ ಸನ್ವಾರಾ ಮಿಸಾಚ್ಯಾ ಬಲಿದಾನಾ ಸವೆಂ ಸಾಂ. ಪೆದ್ರು ವಾಡ್ಯಾಚೆಂ ಫೆಸ್ತ್ ಸಾಂಗಾತಾಚ್ಚ್ ನಿತ್ಯಾಧಾರ್ ಮಾಯೆಚೆಂ ಫೆಸ್ತ್ ಆಸ್‍ಲ್ಲ್ಯಾನ್ ಫಿರ್ಗಜ್ ವಿಗಾರ್ ಮಾ|ಬಾ| ಬೊನವೆಂಚರ್ ನಜರೆತ್ ಆನಿ ಸಯ್ರೆ ಯಾಜಕ್ ಬಾ| ರೋನಿ ಸೆರಾವೊ ಸಂಗಿಂ ಅರ್ಗಾಂ ಬಲಿದಾನ್ ಭೆಟಯ್ಲೆಂ. ವಾಡ್ಯಾಗಾರಾಂನಿಂ ಕಾಣಿಕೊ ಹಾಡ್ನ್ ದೆವಾಕ್ ಅರ್ಗಾಂ ದಿಲಿಂ.
ಉಪ್ರಾಂತ್ಲೆಂ ಕಾರ್ಯೆಂ ಫಿರ್ಗಜ್ ಸಭಾ ಸಾಲಾಂತ್ ಎಕಾ ಕಾಳ್ಜಾಚಿಂ ಎಕಾ ಮನಾಚಿಂ………ಗೀತ್ ಗಾವ್ನ್ ಸುರ್ವಾತ್ ಕೆಲಿ. ಸಹಾಯಕ್ ವಿಗಾರ್ ಬಾ| ರೊಬಿನ್ ಸಾಂತುಮಾಯೆರ್, ಬಾ| ಉದಯ್ ಫೆರ್ನಾಂಡಿಸ್, ಬಾ| ಜೆರಾಲ್ಡ್ ಪಿಂಟೊ ಆನಿ ಬಾ| ರೋನಿ ಸೆರಾವೊ ಆನಿ ಕಾರ್ಯಾಚೆ ಅಧ್ಯಕ್ಷ್ ವಿಗಾರ್ ಬಾಪ್ ಮಾ|ಬಾ| ಬೊನವೆಂಚರ್ ನಜರೆತ್ ಹಾಂಚೆ ಸವೆಂ ವೆದಿ ಸೊಭಯ್ಲಿ. ಶ್ರೀಮತಿ ಅವೀನಾ ಡಿಸೋಜಾ ಹಿಣೆಂ ಸ್ವಾಗತ್ ಕೆಲೆಂ.
ವಾಡ್ಯಾಚಿ ವರ್ದಿ Ronnet Nirmala D’ Souza ಹಿಣೆಂ ಸಭೆರ್ ದವರ್ಲಿ. ಶಿಕ್ಪಾ ಕ್ಷೇತ್ರಾಂತ್ ಬಹು ಅಂಕ್ ಜೊಡ್‍ಲ್ಲ್ಯಾ ಯುವಜಣಾಂಕ್, ವಾಡ್ಯಾಂತ್ ಸಬಾರ್ ತೆಂಪಾ ಥಾವ್ನ್ ಸೆವಾ ದಿಂವ್ಚ್ಯಾ ಶ್ರೀಮತಿ ಫ್ಲೋರಿನ್ ಮೊರಾಸ್, ಶ್ರೀ ಅಜಿತ್ ಮೊಂತೇರೊ ಆನಿ ಪಾಟ್ಲ್ಯಾ ಸಬಾರ್ ವರ್ಸಾಂ ಥಾವ್ನ್ ಉಣ್ಯಾ ದರಾರ್ ಬರೆಂ ಜೆವಾಣ್ ಒದಗ್ಸುನ್ ದಿಂವ್ಚ್ಯಾ ಶ್ರೀಮಾನ್ ಐವನ್ ಡಿಸೋಜ ಹಾಂಕಾಂ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ.
ಜಾಯ್ತ್ಯಾ ತಾಲೆಂತಾಂನಿಂ ಭರ್ಲಲೊ ಯುವಕ್ Johan Mathias ಹಾಣೆಂ ದುಬಾಯ್‍ಂತ್ ಚಲ್‍ಲ್ಲ್ಯಾ Mr & Miss Eclectic International-24 ಹ್ಯಾ ಸ್ಪಧ್ರ್ಯಾಂತ್ 1st Runner up ಜಾವ್ನ್ ನಾಂವ್ ಜೊಡ್ಲಾಂ ತಾಕಾ ವಾಡ್ಯಾ ತರ್ಫೆನ್ ಸನ್ಮಾನ್ ಕೆಲೆಂ.
ವಿಗಾರ್ ಬಾಪಾಂನಿಂ ವಾಡ್ಯಾಚ್ಯಾ ಸರ್ವ್ ಸಾಂದ್ಯಾಂಕ್ ಫೆಸ್ತಾಚೆ ಶುಭಾಶಯ್ ಪಾಠಯ್ಲೆ. ವಾಡ್ಯಾಚೊ ಎಕ್ವಟ್ ಪಳೆವ್ನ್ ಸರ್ವಾಂನಿಂ ಹೊಗ್ಳಿಕ್ ಉಚಾರ್ಲಿ. ಸರ್ವಾಂಕ್ ಮಾನೆಸ್ತ್ ಗಿಲ್ಬರ್ಟ್ ಲೋಬೊ ಹಾಣೆಂ ಧನ್ಯವಾದ್ ಪಾಠಯ್ಲೆಂ. ಮನೋರಂಜನ್ ಕಾರ್ಯಾಂತ್ ಲ್ಹಾನಾಂ ತಶೆಂ ವ್ಹಡಾಂಚೆಂ ನೃತ್ಯ್, ಥೊಡಿಂ ಫೊಕಾಣಾಂ, ಖೆಳ್ ಉಪ್ರಾಂತ್ ಜಿಕ್‍ಲ್ಲ್ಯಾಂಕ್ ಇನಾಮಾಂ ದಿಲಿಂ. ಜೆವ್ಣಾ ಸವೆಂ ಕಾರ್ಯೆಂ ಅಕೇರ್ ಜಾಲೆಂ.
ಯುವಜಣ್ Mr. Mannol Fernandes ಆನಿ Ms. Carol Fernandes ಹಾಣಿಂ ಭೋವ್ ಅಪುರ್ಬಾಯೆನ್ ಸಗ್ಳೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.
– ಅನಿತಾ ಡಿಸೋಜ, ಗುರ್ಕಾರ್ನ್
ಸಾಂ. ಪೆದ್ರು ವಾಡೊ