ಮಾರ್ಚ್ 7 ತಾರಿಕೆರ್ ಬ್ರೆಸ್ತಾರಾ ಸಾಂಜೆರ್ 5.30 ವ್ಹರಾರ್ ಲಿತುರ್ಜಿ ಸೆಮಿನಾರ್ ಆಸಾ ಕೆಲ್ಲಿ. ಲಿತುರ್ಜಿ ಕಮಿಟೆಚಿ ಸಂಚಾಲಕಿ ಮಾನೆಸ್ತಿಣ್ ನೆಲ್ಲಿ ಪಿರೇರಾನ್ ಮಾನಾಧಿಕ್ ವಿಗಾರ್ ಬಾಪ್ ಬೊನವೆಂಚರ್ ನಜ್ರೆತ್, ಫಿರ್ಗಜೆಚೆ ಯಾಜಕ್, ಲಿತುರ್ಜಿ ಸೆಮಿನಾರಾಕ್ ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಆಯಿಲ್ಲ್ಯಾ ಫಾ| ಲಿಯೊ ಲಸ್ರಾದೊಕ್ ತಶೆಂಚ್ ಜಮ್ಲೆಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ. ಗಾಯನ್ ಮಂಡಳಿಚ್ಯಾ ಸಾಂದ್ಯಾಂನಿ ಕಾರ್ಯಾಚೆರ್ ದೆವಾಚೊ ಆಶೀರ್ವಾದ್ ಮಾಗ್ಲೊ. ಮಾನೆಸ್ತಿಣ್ ಹೈಸಿಂಥ್ ಫೆರ್ನಾಂಡಿಸಾನ್ ಫಾ| ಲಿಯೊಚಿ ಮಟ್ಟ್ಯಾನ್ ವಳಕ್ ಕರ್ನ್ ದಿಲಿ. ಉಪ್ರಾಂತ್ ಫಾ| ಲಿಯೊನ್ ದೆವಾಚ್ಯಾ ಉತ್ರಾಂ ವಿಶಿಂ ಥೊಡಿ ಗರ್ಜೆಚಿ ಮಾಹೆತ್ ಆಮ್ಕಾಂ ದಿಲಿ. ಆಮಿಂ ದೆವಾಚೆಂ ಉತಾರ್ ಕಶೆಂ ಪರ್ಗಟ್ ಕರಿಜೆ, ಕಿತೆಂ ಕರಿಜೆ, ಕಿತೆಂ ಕರುಂಕ್ ನ್ಹಜೊ, ಆನಿ ತೆಂ ಆಮ್ಚೆ ಜಿಣ್ಯೆಂತ್ ಕಶೆಂ ಜಿಯೆಂವ್ಕ್ ಜಾಯ್, ದೆವಾಚೆಂ ಉತಾರ್ ಪರ್ಗಟ್ ಕರುಂಕ್ ವೆತಾನಾ ಆಮ್ಚೆಂ ನ್ಹೆಸಾಣ್ ಕಶೆಂ ಆಸೊಂಕ್ ಜಾಯ್ ಮ್ಹಳ್ಳೆಂ ವಿಶಿಂ ಥೊಡೆ ಹಿಶಾರೆ ದೀವ್ನ್ ಗೂಂಡಾಯೆನ್ ಆನಿ ಅರ್ಥಾಭರಿತ್ ರಿತಿನ್ ಮಾಹೆತ್ ದಿಲಿ. ಗ್ರೂಪ್ ಕರ್ನ್, ಆಮಿಂ ಮಿಸಾಚ್ಯಾ ಬಲಿದಾನಾ ವೆಳಾರ್ ಕಶೆಂ ವೆಚೆಂ, ಕಶೆಂ ಲೊಕಾಕ್ ಸಮ್ಜಾಸಾರ್ಕೆಂ ವಾಸ್ಚೆಂ ಮ್ಹಣೊನ್ ಸವಿಸ್ತಾರ್ ಥರಾನ್ ಕಳಯ್ಲೆಂ. ಸೆಮಿನಾರಾಕ್ ಉಪಾಧ್ಯಕ್ಷ್, ಕಾರ್ಯದರ್ಶಿ ಹಾಜರ್ ಆಸ್‍ಲ್ಲಿ. ಮಾನೆಸ್ತ್ ಎರನ್ ಲೋಬೊನ್ ಕಾರ್ಯೆಂ ಚಲವ್ನ್ ವರ್ನ್, ಮಾನೆಸ್ತಿಣ್ ವಿನಿತಾ ಡಿಸೋಜಾನ್ ಧನ್ಯವಾದ್ ಪಾಠಯ್ಲೆಂ. ಹಿ ಲಿತುರ್ಜಿ ಸೆಮಿನಾರ್ ಲಿತುರ್ಜಿ ಕಮಿಟಿಚ್ಯಾ ಸಾಂದ್ಯಾಂನಿ ಭೋವ್ ಅರ್ಥಾಭರಿತ್ ರಿತಿನ್ ಸಂಯೋಜಕಿ ಮಾನೆಸ್ತಿಣ್ ಲಿನೆಟ್ ಫೆರ್ನಾಂಡಿಸಾಚ್ಯಾ ಮುಕೇಲ್ಪಣಾ ಖಾಲ್ ಮಾಂಡುನ್ ಹಾಡ್‍ಲ್ಲಿ. ಹ್ಯಾ ಸೆಮಿನಾರಾಕ್ ಸರಿ ಸುಮಾರ್ 182 ವಾಡ್ಯಾಗಾರಾಂ ಹಾಜರ್ ಆಸೊನ್, ಸೆಮಿನಾರ್ ಭೋವ್ ಅರ್ಥಾಭರಿತ್ ಜಾಲಿ.
