ಮೊಂತಿ ಸಾಯ್ಭಿಣ್ ವಾಡ್ಯಾಚೆಂ ಫೆಸ್ತ್ ಸಪ್ಟೆಂಬರ್ ಮಹಿನ್ಯಾಚ್ಯಾ 17 ತಾರಿಕೆರ್ ಆಯ್ತರಾ ದೀಸ್ ಗುರ್ಕಾರ್ ಮಾನೆಸ್ತ್ ದೀಪಕ್ ಡಿ’ಸೋಜಾಚ್ಯಾ ಮುಖೇಲ್ಪಣಾಖಾಲ್ ಸಂಭ್ರಮಾನ್ ಆಚರಣ್ ಕೆಲೆಂ.
ಫೆಸ್ತಾಚಿ ಸುರ್ವಾತ್ ಸಕಾಳಿಂ 7 ವರಾಂಚ್ಯಾ ಮಿಸಾಚಾ ಬಲಿದಾನಾ ಮುಕಾಂತ್ರ್ ಜಾಲಿ. ಸಾಂಜೆರ್ 6 ವರಾರ್ ಕುಟ್ಮಾ ಸೆವಾ ಕೇಂದ್ರಾಚೊ ಸಂಸ್ಥೊ ಜಾವ್ನಾಸ್ಚ್ಯಾ ಮೋರ್ನಿಂಗ್ ಸ್ಟಾರ್ ಕೊವೆಂತಾಂತ್ ಫೆಸ್ತಾಚೆಂ ಕಾರ್ಯಕ್ರಮ್ ಆಸಾ ಕೆಲೆಂ. ವಿಗಾರ್ ಬಾಪ್ ವಲೇರಿಯನ್ ಸೋಜ ಸಂಗಿಂ ಸಹಾಯಕ್ ವಿಗಾರ್ ಬಾಪ್ ಆನಿ ಇತರ್ ಯಾಜಕ್ ಹಾಜರ್ ಆಸ್‍ಲ್ಲೆ. ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷಿಣ್ ಮಾನೆಸ್ತಿಣ್ ಸಿಸಿಲಿಯ ಪಿರೇರಾ ಆನಿ ಥೊಡ್ಯಾ ವಾಡ್ಯಾಚಿಂ ಗುರ್ಕಾರ್, ಗುರ್ಕಾರ್ನ್ ಹಾಜರ್ ಆಸ್‍ಲ್ಲಿಂ. ಆಮ್ಚೊ ಆದ್ಲೊ ಗುರ್ಕಾರ್ ಮಾನೆಸ್ತ್ ಐವನ್ ಡಿ’ಸೋಜಾನ್ ಹಾಜರ್ ಜಾಲ್ಲ್ಯಾ ಸಮೇಸ್ತಾಂಕ್ ಹಾರ್ಧಿಕ್ ಸ್ವಾಗತ್ ಕೆಲೊ. ವಿಗಾರ್ ಬಾಪಾಂಕ್ ಆನಿ ಮಾನಾಚ್ಯಾ ಸೈರ್ಯಾಂಕ್ ಫುಲಾಂ ದೀವ್ನ್ ಸ್ವಾಗತ್ ಕೆಲೊ. ಮೊಂತಿ ಮಾಯೆಚ್ಯಾ ಇಮಾಜೆಕ್ ಸರ್ವಾಂನಿ ಸಕ್ಕಡ್ ಸಾಂಗಾತಾ ಮೆಳ್ಯಾಂ ಮ್ಹಳ್ಳ್ಯಾ ಗೀತಾ ದ್ವಾರಿಂ ಫುಲಾಂ ಅರ್ಪಿಲಿಂ. ಬಾಪ್ ಎಡ್ವಿನ್ ಮೊನಿಸಾನ್ ಮಾಗ್ಣ್ಯಾವಿಧಿ ಚಲಯ್ಲಿ. ವಾಡ್ಯಾಂತ್ ದೆವಾಧಿನ್ ಜಾಲ್ಲ್ಯಾಂಚ್ಯಾ ಅತ್ಮ್ಯಾಕ್ ಶಾಂತಿ ಮಾಗ್ಲಿ.
ಮಾನೆಸ್ತಿಣ್ ಸುನೀತಾ ಡಿ’ಸೋಜಾನ್ ಸರ್ವ್ ಲ್ಹಾನಾ ವ್ಹಡಾಂಕ್ ವಿವಿಧ್ ಖೆಳಾ ಸ್ಪರ್ಧೆ ಚಲವ್ನ್ ವ್ಹೆಲೆ. ಕ್ವಿಜ್ ಚಲವ್ನ್ ವ್ಹೆಲೊ. ಪ್ರತಿನಿಧಿ ಮಾನೆಸ್ತಿಣ್ ಲಿನೆಟ್ ಪಿಂಟೊ ಆನಿ ಸ್ಲೀಫಾ ಪಿಂಟೊಚ್ಯಾ ತರ್ಭೆತಿನ್ ವಿವಿಧ್ ನಾಚ್ ಯುವಕ್ ಯುವತಿ ಥಾವ್ನ್ ಮನೋರಂಜನ್ ದೀಂವ್ಕ್ ಲಾಗ್ಲೆ. ಹೌಸಿ ಹೌಸಿ ಖೆಳ್ ಆಸಾ ಕೆಲ್ಲೊ.
ವಾರ್ಷಿಕ್ ವರ್ಧಿ ಮಾನೆಸ್ತಿಣ್ ಮರಿಯಾ ಪಿಂಟೊನ್ ವಾಚುನ್ ಸಾಂಗ್ಲಿ. ವಿಗಾರ್ ಬಾಪಾನಿಂ ಆಪ್ಲ್ಯಾ ಸಂದೇಶಾಂತ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯೆಚೊ ಮಹತ್ವ್ ತಿಳ್ಸಿಲೊ. ವಾಡ್ಯಾಂತ್ ಜಮಾತಿಚಿ ಹಾಜ್ರಿ 70% ಆಸ್‍ಲ್ಲ್ಯಾಕ್ ಶಾಭಾಸ್ಕಿ ಉಚಾರ್ಲಿ ಆನಿ ತಶೆಂಚ್ ಸಿಸಿಲಿಯಾ ಪಿರೇರಾ ವಾಡ್ಯಾಗಾರಾಂಕ್ ಅಭಿನಂದನ್ ಪಾಟವ್ನ್ ದೋನ್ ಉತ್ರಾಂ ಉಲಯ್ಲಿ. ಬಾಪ್ ಮೈಕಲ್ ಸಾಂತುಮಾಯೆರಾನ್ ನೊವೆಂ ಆಶೀರ್ವಾದಿತ್ ಕೆಲೆಂ. ನೊವೆಂ ಸೆಂವ್ತಚ್ ಖೆಳಾಂತ್ ವಿಜೇತ್ ಜಾಲ್ಲ್ಯಾಂಕ್ ಬಹುಮಾನ್ ವಿತರಣ್ ಕೆಲೆಂ. ಸಾಕ್ರಿಸ್ತಿನ್ ವಾಲ್ಟರ್ ನಜ್ರೆತಾಕ್ ಉಡಾಸಾಚಿ ಕಾಣಿಕ್ ದಿಲಿ.
ವಾಡ್ಯಾ ಪ್ರತಿನಿಧಿ ಮಾನೆಸ್ತಿಣ್ ಪ್ರೆಸಿಲ್ಲಾ ಫೆರಾವೊನ್ ಸರ್ವಾಂಚೊ ಮನಃಪೂರ್ವಕಿ ಉಪ್ಕಾರ್ ಬಾವುಡ್ಲೊ ಪ್ರತ್ಯೇಕ್ ಜಾವ್ನ್ ಸಂಭ್ರಮ್ ಚಲಂವ್ಕ್ ಹೊಲ್ ದಿಲ್ಲ್ಯಾ ಭಯ್ಣ್ ಸೆಲೆಸ್ತಿನ್ ಡಿಮೆಲ್ಲೊಚೊ ಕಾಳ್ಜಾ ಥಾವ್ನ್ ಉಪ್ಕಾರ್ ಬಾವುಡ್ಲೊ. ತಿಣೆಂ ಘಡ್‍ಲ್ಲ್ಯಾ ಕಂತಾರಾಚ್ಯಾ ಕೆಸೆಟಿ ವರ್ವಿಂ ಸರ್ವಾಂಕ್ ಕಂತಾರಾಂ ಆಯ್ಕೊಂಕ್ ಮೆಳ್ಳಿಂ.
ಕುಮಾರಿ ಶೆರೊನ್ ನೊರೊನ್ನಾ ಆನಿ ಶೆರಿಲ್ ನೊರೊನ್ನಾ ಹಿಂ ಸಗ್ಳ್ಯಾ ಕಾರ್ಯಾಚಿ ನಿರ್ವಹಕಿ ಜಾವ್ನಾಸ್‍ಲ್ಲಿಂ. ಆ್ಯರನ್ ಕೇಟರಿಂಗ್ಸಾಚ್ಯಾ ರುಚಿಕ್ ಜೆವ್ಣಾ ಸಂಗಿಂ ಸೊಭಿತ್ ಥರಾನ್ ಕಾರ್ಯೆಂ ಸಂಪ್ಲೆಂ.