ಮೇ ಮಹಿನ್ಯಾಚಾ 20 ತಾರೀಕೆರ್ ಆಯ್ತಾರಾ ದಿಸಾ ಸಾಂಜೆರ್ 5.00 ವರಾರ್ ಸಾಂ. ಪಾವ್ಲ್ ವಾಡ್ಯಾಚಿ ಜಮತ್ ಆನಿ ವೆಲಂಕಣಿ ವಾಡ್ಯಾಚೆಂ ಉಗ್ತಾವಣ್ ಕಾರ್ಯೆಂ ಮಾನೆಸ್ತ್ ಡೊಲ್ಫಿ ಆನಿ ಹಿಲ್ಡಾ ರೊಡ್ರಿಗಸ್ ಹಾಂಚಾ ಘರಾ ಚಲವ್ನ್ ವೆಲೆಂ.
ಜಮತೆಕ್ ಹಾಜರ್ ಜಾಲ್ಲ್ಯಾ ವಿಗಾರ್‍ಬಾಪ್ ಮಾ|ವಲೇರಿಯನ್ ಸೊಜ್, ಫಿರ್ಗಜ್ ಗೊವ್ಳಿಕ್ ಪರಿಷದೆಚ್ಯಾ ಉಪಾಧ್ಯಕ್ಷಿಣ್ ಮಾನೆಸ್ತಿಣ್ ಸಿಸಿಲಿಯಾ ಪಿರೇರಾ ಹಾಂಕಾ ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಕಾರ್ಯದರ್ಶಿ ತಶೆಂಚ್ ಸಾಂ. ಪಾವ್ಲ್ ವಾಡ್ಯಾಚೊ ಗುರ್ಕಾರ್ ಮಾನೆಸ್ತ್ ಐವನ್ ಫೆರ್ನಾಂಡಿಸಾನ್ ಗುಲೊಬ್ ದೀವ್ನ್ ಬರೊ ಯೆವ್ಕಾರ್ ಮಾಗ್ಲೊ.
ವೆಲಂಕಣಿ ವಾಡೊ ಉಗ್ತಾವಣ್ ಸಂಕೇತ್ ಜಾವ್ನ್ ವೆಲಂಕಣಿ ಮಾಯೆಚಾ ಇಮಾಜಿಕ್ ಫುಲಾಂಚೊ ಝೆಲೊ ಗಾಲ್ನ್ ಮಾನ್ ಕೆಲೆಂ. ಹಾಜರ್ ಜಾಲ್ಲ್ಯಾ ವಿಗಾರ್ ಬಾಪಾಂನಿ, ಫಿರ್ಗಜ್ ಗೊವ್ಳಿಕ್ ಪರಿಷದೆಚ್ಯಾ ಉಪಾಧ್ಯಕ್ಷಿಣ್, ಕಾರ್ಯದರ್ಶಿ ತಶೆಂಚ್ ವೆಲಂಕಣಿ ವಾಡ್ಯಾಚಿ ಪಯ್ಲಿ ಗುರ್ಕಾರ್ನ್ ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸ್, ವಾಡ್ಯಾ ಪ್ರತಿನಿಧಿ ಟೀನಾ ಫೆರ್ನಾಂಡಿಸ್ ಆನಿ ರೊನಾಲ್ಡ್ ಫೆರ್ನಾಂಡಿಸಾನ್ ಕಾರ್ಯಾಕ್ ಸಾಂಗಾತ್ ದಿಲೊ.
ಉಪ್ರಾಂತ್ ವೆಲಂಕಣಿ ವಾಡ್ಯಾಕ್ ಆದೇವ್ಸ್ ಮಾಗೊನ್ ಸಾಂ. ಪಾವ್ಲ್ ವಾಡ್ಯಾಚಾ ಮಾನೆಸ್ತಿಣ್ ಎಡ್ನಾ ವೇಗಸ್ ಆನಿ ಪಂಗಡಾನ್ ಆದೇವ್ಸ್ ಪದ್ ಗಾಯ್ಲೆಂ. ನವ್ಯಾನ್ ಚುನಾಯಿತ್ ಜಾಲ್ಲ್ಯಾ ವೆಲಂಕಣಿ ವಾಡ್ಯಾಚಿ ಗುರ್ಕಾರ್ನ್ ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸ್ ಆನಿ ವಾಡ್ಯಾ ಪ್ರತಿನಿಧಿಂಕ್ ಸಾಂ. ಪಾವ್ಲ್ ವಾಡ್ಯಾಚಾ ಗುರ್ಕಾರಾನ್ ಗುಲೊಬ್ ದೀವ್ನ್ ಅಭಿನಂದನ್ ಪಾಟೈಲೆಂ.
ಭೋವ್ ಆಪುರ್ಬಾಯೆಚೆ ಪದ್ ಘಡ್ನ್ ತಾಳೊ ದಿಲ್ಲ್ಯಾ ಎಡ್ನಾವೇಗಸಾಕ್ ತಶೆಂಚ್ ವ್ಹಾಜಂತ್ರ್ ವ್ಹಾಜವ್ನ್ ಸಹಕಾರ್ ದಿಲ್ಲ್ಯಾ ಕ್ರಿಸ್ತೋಫರ್ ರೊಡ್ರಿಗಸಾಕ್ ಗುರ್ಕಾರಾನ್ ಕೃತಜ್ಞತಾ ಪಾಟೈಲಿಂ. ತಶೆಂಚ್ ಸಾಂ. ಪಾವ್ಲ್ ವಾಡ್ಯಾಂತ್ ಆಮಿಂ ಸಾಂಗಾತಾ ಆಸ್ತಾನಾ ವಾಡ್ಯಾಚಾ ಹರ್ಯೇಕಾ ಕಾರ್ಯಾಕ್ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ಗುರ್ಕಾರ್ ಐವನ್ ಫೆರ್ನಾಂಡಿಸಾನ್ ಉಪ್ಕಾರ್ ಆಟೈಲೊ.
¨ಉಪ್ರಾಂತ್ ವೆಲಂಕಣಿ ವಾಡ್ಯಾಚಿ ಗುರ್ಕಾರ್ನ್ ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸಾನ್ ಸಾಂ.ಪಾವ್ಲ್ ವಾಡ್ಯಾಚಾ ಗುರ್ಕಾರಾಕ್, ವಾಡ್ಯಾಪ್ರತಿನಿಧಿಂಕ್ ಆನಿ ಏರಿಯಾ ಲೀಡರಾಂಚೊ ಉಪ್ಕಾರ್ ಆಟೈಲೊ ಆನಿ ಗುಲೊಬ್ ದೀವ್ನ್ ಮಾನ್ ಕೆಲೊ. ತಶೆಂಚ್ ಸಾಂ. ಪಾವ್ಲ್ ವಾಡ್ಯಾಚೊ ಉಪ್ಕಾರ್ ಬಾವ್ಡುನ್ ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸ್ ಆನಿ ಪಂಗ್ಡಾನ್ ಪದ್ ಗಾಯ್ಲೆಂ ಆನಿ ಸಾಂ. ಪಾವ್ಲ್ ವಾಡ್ಯಾಚಾ ಗುರ್ಕಾರಾಕ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೆಂ.
ವಿಗಾರ್ ಬಾಪಾನ್ ಭೋವ್ ಆಪುರ್ಬಾಯೆಚೊ ಸಂದೇಶ್ ದಿಲೊ. ಪೆಂತೆಕೊಸ್ತಾಚಾ ಪರ್ಬೆಚಾ ದಿಸಾ ದೆವಾಚಾ ಮಾಂಡಾವಳಿ ಪರ್ಮಾಣೆ ಅಧಿಕ್ರತ್ ಥರಾನ್ ವೆಲಂಕಣಿ ವಾಡ್ಯಾಚಿ ಗುರ್ಕಾರ್ನ್ ಜಾವ್ನ್ ಚುನಾಯಿತ್ ಜಾಲ್ಲ್ಯಾ ಮಾನೆಸ್ತಿಣ್ ಹಿಲ್ಡಾ ರೊಡ್ರಿಗಸಾಕ್ ಅಭಿನಂದನ್ ಪಾಟೈಲೆಂ. ತಶೆಂಚ್ ಪಾಟ್ಲ್ಯಾ ನೋವ್ ವರ್ಸಾಂ ಥಾವ್ನ್ ಸಾಂ. ಪಾವ್ಲ್ ವಾಡ್ಯಾಚಾ ವಾಡಾವಳಿಕ್ ಖಾಂದ್ ಮಾರುನ್, ಭಾವಾಡ್ತಿ ಕುಟ್ಮಾ ಸಾಂಗಾತಾ ದವ್ರುನ್ ಜೆಜುಚಾ ಆನಿ ಮರ್ಯೆಚಾ ಮೊಗಾನ್ ಆನಿ ಸಾಂ. ಪಾವ್ಲಾಚಾ ಸ್ಪಿರಿತಾನ್ ಭರುನ್ ವಾಡೊ ಚಲೈಲ್ಲ್ಯಾ ಗುರ್ಕಾರ್ ಮಾನೆಸ್ತ್ ಐವನ್ ಫೆರ್ನಾಂಡಿಸಾಕ್ ಬರೆಂ ಮಾಗೊನ್ ಅಭಿನಂದನ್ ಪಾಟೈಲೆಂ. ತಾಚೆ ಸಾಂಗಾತಾ ವಾವ್ರ್ ಕರ್ಚ್ಯಾ ತಾಚಾ ಪತಿಣೆಕ್ ಆನಿ ವಾಡ್ಯಾ ಪ್ರತಿನಿಧಿಂಚೊ ಉಪ್ಕಾರ್ ಆಟೈಲೊ.
ಉಪಾಧ್ಯಕ್ಷಿಣ್ ಮಾನೆಸ್ತಿಣ್ ಸಿಸಿಲಿಯಾ ಪಿರೇರಾನ್ ವೆಲಂಕಣಿ ವಾಡ್ಯಾಚಿ ಗುರ್ಕಾರ್ನ್ ಹಿಲ್ಡಾ ರೊಡ್ರಿಗಸಾಕ್ ಆನಿ ವಾಡ್ಯಾ ಪ್ರತಿನಿಧಿಂಕ್ ಉತ್ತೇಜನಾಚಾ ಉತ್ರಾದ್ವಾರಿಂ ಬರೆಂ ಮಾಗ್ಲೆಂ.
ಶ್ರೀಮತಿ ಜೆಸಿಂತಾ ಫೆರ್ನಾಂಡಿಸಾನ್ ಸರ್ವಾಂಕ್ ಧನ್ಯವಾದ್ ಪಾಟೈಲೆ.
ವರ್ದಿ : ಶ್ರೀಮತಿ ಜಸಿಂತಾ ಫೆರ್ನಾಂಡಿಸ್
ಸಾಂ. ಪಾವ್ಲ್ ವಾಡೊ