2018-19ವ್ಯಾ ವರ್ಸಾಂಚೆಂ ಕ್ರಿಸ್ತಾಂವ್ ಶಿಕ್ಷಣ್ ದಿವಸ್ ಫೆಬ್ರವರಿ 24ವೆರ್ ಭೋವ್ ಆರ್ಥಾಭರಿತ್ ರೀತಿನ್ ಆಚರಣ್ ಕೆಲೆಂ. ಸಕಾಳಿಂ 8.15ವೆರ್ ಸರ್ವ್ ದೊತೊರ್ನಿಚ್ಯಾ ಭುರ್ಗ್ಯಾಂಚಿ ಆವಯ್ – ಬಾಪಯ್ ತಾಂಚಾ ಶಿಕ್ಷಕಾಂಕ್ ಮೆಳೊನ್ ಭುರ್ಗ್ಯಾಂನಿ ಜೊಡ್‍ಲ್ಲ್ಯಾ ಫಲಿತಾಂಶ್ ತಶೆಂಚ್ ಭುರ್ಗ್ಯಾಂಚೆಂ ಫಿರ್ಗಜ್ ಚಟುವಟಿಕಾಂನಿ ಮೆತೆರ್‍ಪಣ್ ಹಾಚೆ ವಯ್ರ್ ಸಮ್ಜೊಣಿ ಜೊಡ್ಲಿ. ಉಪ್ರಾಂತ್ 9.30 ವೊರಾರ್ ದೆವಾಕ್ ಅರ್ಗಾಂ ದೀಂವ್ಕ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ. ಪ್ರಧಾನ್ ಯಾಜಕ್ ಜಾವ್ನ್ ಜೆಪ್ಪು ಸೆಮಿನರಿಚೊ ರೆಕ್ಟರ್ ಮಾ|ಬಾ|ಜೋಸೆಫ್ ಮಾರ್ಟಿಸ್ ತಶೆಂಚ್ ಫಿರ್ಗಜ್ ಯಾಜಕಾಂ ಸಂಗಿಂ ಎವ್ಕರಿಸ್ತಿಕ್ ಬಲಿದಾನ್ ಭೆಟಯ್ಲೆಂ. ಆಮ್ಚೊ ಭಾವಾರ್ಥ್ ದೆವಾಚಾ ಉತ್ರಾಚೆರ್ ತಶೆಂಚ್ ಪವಿತ್ರ್ ಸಭೆಚಾ ಶಿಕವ್ಣೆ ವಯ್ರ್ ಬಾಂದುನ್ ಹಾಡ್ಲ್ಯಾರ್ ಆಮ್ಚೊ ಭಾವಾರ್ಥ್ ಗೂಂಡ್ ತಶೆಂಚ್ ಘಟ್ ಉರ್ತಾ, ಕಸಳೆಂಚ್ ವಾದಾಳ್ ಆಯ್ಲ್ಯಾರಿ ಆಮಿ ತೆ ಫುಡ್ ಕರುಂಕ್ ಸಕ್ತೆಲ್ಯಾಂವ್ ಮ್ಹಳ್ಳಿ ಶಿಕವ್ಣ್ ಬಾಪ್ ಜೋಸೆಫ್ ಮಾರ್ಟಿಸ್ ಹಾಣಿಂ ಭುರ್ಗ್ಯಾಂಕ್ ದಿಲಿ. ಸರ್ವ್ ಭುರ್ಗ್ಯಾಂನಿ ವ್ಹಡ್ ಭಕ್ತಿಪಣಾನ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ, ಸಬಾರ್ ಭುರ್ಗ್ಯಾಂನಿ ಮಿಸಾವೆಳಾರ್ ಕಾಣಿಕ್ ಭೆಟಯ್ಲಿ, ಭುರ್ಗ್ಯಾಂಚಾ ಗಾಯಾನ್ ಮಂಡಳಿನ್ ಬರ್ಯಾ ರೀತಿನ್ ಗಾಯಾನ್ ಗಾವ್ನ್ ಮೀಸ್ ಅರ್ಥಾಭರಿತ್ ಜಾಂವ್ಕ್ ಆಧಾರ್ ದಿಲೊ.
ಸಾಂಜೆರ್ 5.00 ವರಾರ್ ಮಿಲಾರ್ ಜುಬಿಲಿ ಹೊಲಾಂತ್ ಸಾಂಸ್ಕೃತಿಕ್ ಕಾರ್ಯಕ್ರಮ್ ಭುರ್ಗ್ಯಾಂನಿಚ್ಚ್ ಮಾಂಡುನ್ ಹಾಡ್‍ಲ್ಲೆಂ. ವಿವಿಧ್ ಕ್ಲಾಸಿಚಾ ಭುರ್ಗ್ಯಾಂನಿ ತಾಂಚಾ ಶಿಕ್ಷಕಾಂಚಾ ಮಾರ್ಗದರ್ಶನಾಖಾಲ್ ವಿವಿಧ್ ಆತ್ಮೀಕ್ ಆಧಾರ್ ದಿಂವ್ಚಿ ಕಾರ್ಯಿಂ ಮಾಂಡುನ್ ಹಾಡ್‍ಲ್ಲಿಂ, ಭೋವ್ ಉಮೆದಿನ್ ಆನಿ ಕಾರ್ಯಾಳ್ ಜಾವ್ನ್ ಭುರ್ಗ್ಯಾಂನಿ ಪ್ರದರ್ಶನ್ ಕೆಲಿಂ. ಹ್ಯಾ ಕಾರ್ಯಾಕ್ ಮುಖೆಲ್ ಸೈರಿ ಜಾವ್ನ್ ಫಾತಿಮಾ ವಾಡ್ಯಾಚಿ ಶ್ರೀಮತಿ ಕ್ಲಾರಿಸ್ಸಾ ರೊಡ್ರಿಗಸ್ ಹಾಜರ್ ಆಸ್‍ಲ್ಲಿ. ತಿಚಾ ಸಂದೇಶಾಂತ್ ದೊತೊರ್ನೆವರ್ವಿಂ ಆಮಿ ದೆವಾಚೆರ್ ಆಮ್ಚೊ ಭಾವಾರ್ಥ್ ಸದಾಂಚ್ ಘಟ್ ದವರುಂಕ್ ಶಿಕ್ತಾಂವ್ ಆನಿ ಕಷ್ಟಾಂ ವೆಳಾರ್ ದೆವಾಚೊ ಆಧಾರ್ ಮಾಗೊಂಕ್ ಶಿಕ್ತಾಂವ್ ಮ್ಹಳ್ಳೊ ಸಂದೇಶ್ ಪಾಟೈಲೊ. ವಿಗಾರ್ ಬಾಪಾಂನಿ ದೊತೊರ್ನೆಕ್ ಆಯಿಲ್ಲ್ಯಾ ಸರ್ವ್ ಭುರ್ಗ್ಯಾಂಚೊ, ಸಾಂಸ್ಕೃತಿಕ್ ಕಾರ್ಯೆಂ ಪ್ರದರ್ಶಿತ್ ಕೆಲ್ಲ್ಯಾ ಭುರ್ಗ್ಯಾಂಚೊ, ಕ್ರಿಸ್ತಾಂವ್ ಶಿಕ್ಷಣ್ ಮಾಂಡುನ್ ಹಾಡ್‍ಲ್ಲ್ಯಾ ಸಹಾಯಕ್ ವಿಗಾರ್ ಬಾಪ್ ಎಡ್ವಿನ್ ಮೊನಿಸ್, ಸರ್ವ್ ಶಿಕ್ಷಕಾಂಚೊ ಉಪ್ಕಾರ್ ಭಾವುಡ್ಲೊ. ಕಾರ್ಯಾಕ್ ಬಾಪ್ ಎಡ್ವಿನ್ ಮೊನಿಸ್ ಹಾಂಣಿ ಸ್ವಾಗತ್ ಪಾಟೈಲೊ. ವೆದಿ ಕಾರ್ಯೆಂ ಶ್ರೀಮತಿ ಪ್ರಿಮಿ ವಾಲ್ಡರ್ ತಶೆಂಚ್ ಸಾಂಸ್ಕೃತಿಕ್ ಕಾರ್ಯೆಂ ಲಿವಿಯಾ ಆನಿ ಮಾನಸ್ ಹಾಂಣಿ ಚಲವ್ನ್ ವ್ಹೆಲೆಂ. ವೆದಿ ಕಾರ್ಯಾವೆಳಿಂ ದೊತೊರ್ನಿಚಿ ಸಂಯೋಜಕಿ ಶ್ರೀಮತಿ ಸಿಂತಿಯಾ ಮಾರ್ಟಿಸ್ ಹಾಣಿ ಸಗ್ಳ್ಯಾ ವರ್ಸಾಚಿ ವರ್ದಿ ಜಮ್ಯಾ ಹುಜಿರ್ ದವರ್ಲಿ. ಕಾರ್ಯಾಕ್ ಫಿರ್ಗಜ್ ಗೊವ್ಳಿಕ್ ಪರಿಷದೆಚಿ ಉಪಾಧ್ಯಕ್ಷಿಣ್ ಶ್ರೀಮತಿ ಸಿಸಿಲಿಯಾ ಪಿರೇರಾ, ಕಾರ್ಯದರ್ಶಿ ಶ್ರೀಮಾನ್ ಐವನ್ ಫೆರ್ನಾಂಡಿಸ್ ಹಾಜರ್ ಆಸ್‍ಲ್ಲೆ. ಧನ್ಯವಾದ್ ಕಾರ್ಯಾಚಿ ಸಂಯೋಜಕಿ ಶ್ರೀಮತಿ ಐಡಾ ಸಿಕ್ವೇರಾನ್ ಅರ್ಪಿಲೆ. ನಿಮಾಣೆ ಸಗ್ಳ್ಯಾ ವರ್ಸಾ ಕ್ರಿಸ್ತಾಂವ್ ಶಿಕ್ಷಣಾಕ್ ಸದಾಂಚ್ಚ್ ಹಾಜರ್ ಜಾಲ್ಲ್ಯಾ ಭುರ್ಗ್ಯಾಂಕ್, ಪರೀಕ್ಷೆಂತ್ ಪ್ರಥಮ್ ಆನಿ ದುಸ್ರೆಂ ಸ್ಥಾನ್ ಆಪ್ಣಾಯಿಲ್ಲ್ಯಾಂಕ್ ತಶೆಂಚ್ ನೋಟ್ ಬೂಕ್ ಭೋವ್ ಆಪೂರ್ಬಾಯೆನ್ ಕೆಲ್ಲ್ಯಾ ಭುರ್ಗ್ಯಾಂಕ್ ಇನಾಮಾಂ ವಾಂಟ್ಲಿಂ. ಕ್ರಿಸ್ತಾಂವ್ ಶಿಕ್ಷಣ್ ದಿಲ್ಲ್ಯಾ ಸರ್ವ್ ಶಿಕ್ಷಕಾಂಕ್ ಉಗ್ಡಾಸಾಚಿ ಕಾಣಿಕ್ ವಿಗಾರ್ ಬಾಪಾಂನಿ ವಾಂಟ್ಲಿ.
ಹ್ಯಾ ಸಗ್ಳ್ಯಾ ವರ್ಸಾ ಭುರ್ಗ್ಯಾಂಕ್ ಕ್ರೀಸ್ತಾಚಾ ಮೊಗಾಂತ್ ವಾಡೊಂಕ್ ಕ್ರಿಸ್ತಾಂವ್ ಶಿಕ್ಷಣ್ ದೀಂವ್ಕ್ ಮಾರ್ಗದರ್ಶನ್, ಸಹಕಾರ್ ದಿಲ್ಲ್ಯಾ ವಿಗಾರ್ ಬಾಪಾಂಕ್, ಸರ್ವ್ ಮಾಂಡಾವಳ್ ಕೆಲ್ಲ್ಯಾ ಸಹಾಯಕ್ ವಿಗಾರ್ ಬಾಪಾಂಕ್, ಸರ್ವ್ ಫಿರ್ಗಜ್ ಯಾಜಕಾಂಕ್, ಶಿಕ್ಷಕಾಂಕ್, ಭುರ್ಗ್ಯಾಂಕ್ ಉತ್ತೇಜನ್ ದಿಲ್ಲ್ಯಾ ತಾಂಚಾ ಆವಯ್- ಬಾಪಾಯ್ಕ್, ವ್ಹಡಿಲಾಂಕ್ ಆನಿ ಭುರ್ಗ್ಯಾಂಕ್ ತಶೆಂಚ್ ವ್ಹಡ್ ಹುಮೆದಿನ್ ಜೆಜುಚಿ ವಳಕ್ ಭುರ್ಗ್ಯಾಂಕ್ ದೀಂವ್ಕ್ ವಾವ್ರ್ ದಿಲ್ಲ್ಯಾ ಸರ್ವ್ ಶಿಕ್ಷಕಾಂಕ್ ದೇವ್ ಬೊರೆಂ ಕರುಂ ಆನಿ ದೆವಾಚೊ ಆಶೀರ್ವಾದ್ ಆನಿ ಮರಿಯೆ ಮಾಯೆಚಿಂ ಧಾರಾಳ್ ಬೆಸಾಂವಾಂ ವೊತುಂದಿತ್.
ಶ್ರೀಮತಿ ಐಡಾ ಸಿಕ್ವೇರಾ